Tura, Risaw 15 : Ki Pulit ka West Garo Hills hynnin ka miet kila ioh ban kem ia 3 ngut ki riewkiengatiar kiba suba jur ba dei ki kynhun nongtuh nonglute bad ioh ruh ban kurup ia kawei ka pistol.
Ia kine ki runar la ioh kem da ki Pulit ka Phulbari, ha ka jingkhynra bala pynlong ha ka shnong Nikikona kaba hap hapoh ka Phulbari Police Station, West Garo Hills.
Kine ki lai ngut ki kyrteng u Silman R. Marak (30 yrs), ba na Komilapara, West Garo Hills, u Elias Alom ba 24 snem na Babupara, New Bhaitbari, West Garo Hills bad u Nur Hussain ba 22 snem ba na Gomaijhora Sialkandi, West Garo Hills.
Kat kum ka jingpyntip u Superintendent of Police ka District, na kine ki lai ngut la ioh ban kurup ia kawei ka pistol, kawei ka magazine, lai tylli ki kuli bym pat pyndonkam, kawei ka thuk thuk ba don u nombor ML08-G-4295, kawei ka Scooty bym don nombor, artylli ki mobile phone bad artylli ki Sim Card.
Ki pulit kila register case pyrshah ia kine ki runar hapoh ka kyndon Arms Act bad ka jingtohkit mynta kala iaid shakhmat ban lapdien ioh dang don ki paralok jong ki, kiba ju leh ia ki kam bymman bad ruh ia ka jingdonkti jong ki ha ki kam pyntriem hapoh ka District.
