Shillong, Nailur 20: Ki Pulit ka East Khasi Hills, kila ioh ban kem haduh 3 ngut ki snar nongtuh thuk thuk bad ioh ban kurup haduh 16 tylli ki thuk thuk ba kynthup ia 15 tylli ki bike bad kawei ka Scooty bala tuh na kylleng ki jaka.
Kane ka jingiohkem ia kine ki snar nongtuh kala wan jia hadien ka jingshah tuh jong kawei ka bike Pulsar na Laitsohpliah, Sohra kaba la jia ha ka 9 tarik Nailur 2022. Ia kane ka case la register hapoh ka Sohra Police Station hapoh ka kyndon 379/34 IPC.
U Superintendent of Police (City) Bah Vivek Syiem, u pyntip ba halor kane ka jingjia, ki Pulit kila ioh jingtip ba ia kane ka thuk thuk la iohi hajan Mairang bad mar mar ka kynhun na Sohra Police Starion kila hiar sha Mairang bad da ka jingiarap ki Pulit ka Mairang, kila ioh ban bat ia kane ka thuk thuk bad kila ioh ban kem ia arngut ki briew na Mairang.
Une u Heh Pulit u pyntip ba ha ka jingtohkit, kine ki arngut kila phla ba bun ki kali arshaka la tuh na Shillong da uwei u snar ba na ka shnong Nongsohma, kaba hap hapoh ka Eastern West Khasi Hills District.
“Ha ka 18 tarik Nailur por 9 baje mynmiet, ka kynhun ki Pulit na Sohra kila hiar sha Nongsohma da ka jingialam lynti uwei na kine kiba ioh kem bad kila ioh ban kem noh ia une u snar bah na Nongsohra, uba la kubur ia ki jingdonkti ban tuh ia kiba bun ki kali arshaka na kylleng ki jaka ka Nongbah Shillong lem bad kiwei kiwei ki Jaka” ong u Bah Vivek.
U pyntip ba da ka jingphla jong u, ka kynhun ki Pulit ha kane hi ka miet kila ioh ban kurup noh ia artylli ki bike bad kawei ka scooty.
U Bah Vivek u pyntip ba ha ka step 19 tarik Nailur, kane ka kynhun ki Pulit na Sohra bala ialam da u Officer Incharge Inspector Pynhunlang M Syiem lem bad ka Inspector Phrianglun Syiem I/C Nongthymmai Beat House bad u Sub Inspector Stephen Nongspung uba dei u Investigation Office (IO) lem bad ka kynhun Special Cell na Shillong, kila ioh ban kurup biang sa 11 tylli ki bike na ka shnong Nongsohma.
Kane ka kynhun ki Pulit kila lap ruh ia kawei ka karkhana kaba pynkylla (modify) bad kylliang nombor plate jong ki bike ba shah tuh da kaba buh da ki nombor thok, kaba don ha ka dong Nongkrem, kaba hap hapoh ka shnong Nongsohma.
Ka jingtohkit ia kine ki runar kala iaid shakhmat mynta ban pynthikna ia ka jingdonkti jong ki ha kiwei kiwei ki kam tuh kali ar shaka ha kylleng ki jaka jong ka District.
