Nongpoh, Lber 26 : Arngut ki briew kila shah kem ha ryngkat ki suloi bad ka doh hati na kawei ka shnong jong ka Ri-Bhoi District.
Kine ki arngut ki kyrteng u Querenius Muktieh (27) bad u Jethril Umbah (32).
Ia kine ki arngut la kem ha ka miet sngi Ba-ar, da ki nongshongshnong ka Mawpdeng kaba don ha khappud ka Assam-Meghalaya bad kaba hap hapoh ka Umsiang OP, Ri-Bhoi. Na ka met kine ki briew la ioh kurup ia artylli ki suloi shna hi bad ka doh hati bala thad, ong ki Pulit.
Ia kine ki arngut ki briew la leit ban shimti noh da ki Pulit bad la ialam ban leh medical checkup. Ki Pulit kila kurup noh ruh ia ki suloi bad ka doh hati ban phah leh FSL.
Ki heh Ophisar ka Tnad Forest na Sonapur Range, Kamrup East Division, Basistha, Guwahati, kila pyntip ba artylli ki hati kila shah pyniap naduh u Naiwieng 2024. Ia ka shyieng ka shruh u hati ba iap nyngkong la lap ha ka 16 tarik Naiwieng 2024 bad uba ar ula lap ha ka 18 tarik Lber, 2025 bad la suba jur ba kine ki arngut ki dei kiba donkti ban siatiap.
Halor kane ka jingjia, ki Pulit kila register case hapoh ka Khanapara Police Station bad ka jingtohkit mynta kala iaid shakhmat.
