Tura, Lber 22 : Ki Pulit ka East Garo Hills, kila ioh kem ia arngut ki runar kiba donkti ha ki kam dawa pisa ha ka kyrteng jong ka GNLA-R na ka khlam Rongjeng.
Ki briew ki bym lah ban ithuh kiba kam ialade ba mihkhmat ia ka kynhun Garo National Liberation Army-Regroup (GNLA-R) kila leit byrngem briew bad dawa pisa na ki nongshongshnong Rongjeng, East Garo Hills ban pynurlong ia ki kam ba ki thmu.
Kine ki briew kila dawa pisa na ki hehspah ha Rongjeng myn ha ka 18 tarik Lber ryngkat ka byrngem byrsit ba kin hiar thma lada kim ai ia ka pisa, kaba la pynbeit ban aiti hynnin ka 21 tarik Lber hapoh ka Rongjeng Reserve Forest.
Khlem ka jingsheptieng ia kane ka jingbyrngem, kine ki briew kila leit ban mudui sha ki Pulit ka Rongjeng bad ujor syndon da ka ejahar halor kane ka kam kine ki runar.
Ki Pulit ka East Garo Hills mar mar kila sdang ia ka jingtohkit bad tang khyndiat sngi hadien, kila lah ban ithuh ia uwei na kiba phone ia kine ki heh spah.
Ki Pulit kila leit ban pynapshrip ia kine ki runar kiba dei ban wan shimti ia ka pisa hynnin ka sngi ha khlaw Rongjeng bad kila ioh ban kem da kaba suk ia kine ki briew.
Ki Puit kila ioh kem shuwa ia u Predickson N Sangma ba khot sin u Ara ba na Ambre A’ding, Rongjeng bad hadien kila ioh sa ia uwei pat uba kyrteng u Setbingstar D Shira ba khot sin u Negro, uba dei na ka shnong Nongchram Dekmin.
U Superitendent of Police bah A.S Rynjah ula pyntip ba ka jingkhynra mynta ka dang iaid shakhmat ban iohkem ia kiwei pat ki dkhot jong kane ka kynhun.
