Shillong, Rymphang 06 : Ki Pulit ka Anti Narcotics Task Force (ANTF) hynne ka sngi Ba-ar, kila ioh kem ia 2 ngut ki briew lem bad uwei u Khynnah uba dei u Khun jong uwei napdeng kine ki arngut, katba ki dang khaii droks ha ka thain Jingkieng Lawmali.
Ia kine ki briew la ioh kem ha ka por 11:30 baje mynstep na kawei ka kali Hyundai 120 rong iong kaba don u nombor AS01 AT-0888.
Na kine ki briew, ki Pulit kila ioh kurup ia 2.10 gram u heroin, 8 tylli u dawai kuli Nitrazepam, 2 tylli ki spasmo proxyvon, 10 tylli ki thyrnia injek, 6 tylli ki mobile phone, kawei ka tari, ka pisa T. 9710, kawei ka scooty ML05-R-8293, 10 tylli ki tin duma, 66 tylli ki bilor plastic rit ba bit heroin bad kawei ka mobile phone ba sniew.
Ki Pulit kila register case ia kine ki briew hapoh ka kyndon jong ka NDPS Act. La ong ba kine ki arngut ki dei ki briew kiba la don dak sniew ha ki kam thok kam shukor.
