Shillong, Naitung 17: Ki Pulit ka East Khasi Hills kila kem haduh 15 ngut ki briew kiba leh kam awria bad la pynngat ia ki hapoh ka Immoral Trafficking Prevention Act.
U Superintendent of Police Bah Sylvester Nongtnger ha ka sngi Nyngkong ula ong ba ka jingiaid pahara ka kjat ha ki thain Khyndailad ban leh eiei pyrshah ia ki nongdie met kiba ha kaba bun ki khep kam long tang ba ki die met sha ki briew hynrei ki wanrah ruh ia kiba bun ki jingkulmar bad huri hura.
Halor kane, ki Pulit kila register case ia kine ki briew hapoh ka Immoral Trafficking Prevention Act.
Une u Heh Pulit u pyntip ba kila pynlong ruh ia ka jingkhynra kyaid bad pynjur ia ka jingiaid pahara ha kylleng ka Nongbah Shillong na ka bynta ka jingshngain ki paidbah bad ban tehlakam ia kino kino ki huri hura.
Ha kane ka jingkhynra, ki Pulit kila ioh ban kurup ia palat 1,12,097 ml ka kyiad IMFL bad 7,74,000 ml ka kyiad pyrsi. Ia kane ka jingkhynra la pynlong ha ka thain Motphran, Paltan Bazar, Mawblei, Nongrim Hills, Laitumkhrah Bazar, Mawlonghat, Urkaliar, Upper Shillong, Polo, Mawbah, Jhalupara bad Upper Mawprem da ka jingiarap lang ki Pulit Commando Kynthei bala tip kum ki Meghashakti.
Ha kajuh ka por, ki Pulit kila bat haduh 277 tylli ki kali bad ioh dain kuna haduh T. 236500 na ka jingpynkhein ia ki Traffic Rules ha ka jingtalasi kali bad miet bad step da ka Shillong Traffic Police ha kylleng ki jaka. Kine ki briew ba ngat ha ka kyna ki dei kiba niah kali ha ka jingbuaid kyiad, niah thuk thuk khlem helmet, pynkylla ia ki silenser, tah iit iong bad kiwei.
