Shillong, Jymmang 08 : Ki Pulit ka Lumshnong, East Jaintia Hills, kila ioh kem ia 3 ngut ki nongkhaii droks bad ioh kurup ia u droks heroin uba shongdor haduh T. 3.6 klur.
Ia kine ki Nongkhaii droks la ioh kem ha ka jingtalasi ia ki bos Night Super hynne ka step phyrngap halor ka jingioh khubor ban don ki briew kiba wan pynpoi droks ha ka thain Silchar, Assam sha Guwahati.
Ki Pulit ki iohkem ia kine ki briew na ki artylli ki Night Super bad na ka met jong ki, la ioh kurup ia u heroin bala thep ha ki 40 tylli ki synduk sabon ba shongdor T. 3.6 klur nalor u ganja ba khia 9.031 kilo bad saw tylli ki mobile phone.
Kine ki briew ki kyrteng u Amzad Hussain Lasker ba na ka shnong Rajnagar, Cachar, u Monib Hussain Basker ba na Bangram, Cachar bad u Chamir Hussain Barbhuiya ba na Silchar, Cachar.
Ki Pulit ki pyntip ba kane ka jingioh kurup ka dei ka sien kaba san tang ha kine ki 10 sngi bala leit noh.
Ka jingioh kurup jingduh pynbuaid da ki Pulit ka East Jaintia Hills ha kine ki 10 sngi kala kot haduh T. 15 klur.
Ia kine ki 3 ngut ba dang shu iohkem la register case hapoh ka NDPS Act bad ka jingtohkit mynta kala iaid shakhmat.
