Shillong, Nailur 28: 2 ngut ki briew kiba suba rung be-aiñ na Bangladesh ki la shah bat haka shnong Nongtrai, East Khasi Hills bad kane ka la pynlong ïa ka Hynñiewtrep Youths’ Council (HYC) ban dawa ban pynlong ka jingtohkit kaba bniah bad kaba khlem shah liang.
Haka kyrwoh ka HYC Nongtrai Unit ka la ong ba ka la pyntip sha ki bor Pulit hadien ba ka la ioh jingtip halor ka jingsuba ba ki don ki briew kiba rung beain ha ka 26 tarik Nailur.
Halor kane, ka HYC kala ujor daka ejahar ha Mawsynram Police Station.
“Katkum ka ejahar, kitei ki arngut, kata Jhinuk Hijrani, 22 snem ka rta bad Priyanka Kumari 20 snem ka rta, ki la shah bat bad lap ba ki wan sha ka thain lyngba ka kali kaba don ia u number ML 05 AC 5971. Ia kane ka case la register hapoh ki kyndon Sections 12(1)(a) bad (c) jong Passport Act, 1967,”
Ia kane ka jingtohkit la aiti ha u SI Rochestar Warshong jong ka Mawsynram Police Station.
Haba dawa ïa ka jingtohkit kaba bniah, ka HYC Nongtrai Unit ka la kyntu ïa ki bor ba dei peit ban pynlong ïa ka jingtohkit kaba bniah bad kaba khlem shah liang ban pynthikna bad pynshisha ïa ka jinglong trai ri jong ki 2 ngut ki briew, ban bishar bniah ïa ki kot ki sla jong ki, ban pynthikna ïa ka lynti ba ki wan ba bad ban tip lada don mano mano ba ialam iaki sha kane ka Jylla”.
“Iaka jingtip ba bniah jong ki 2 ngut, bad kidei naka jaidbynriew aiu bad iaka shnong trai jong ki dei ban tohkit bniah bad dei ban pynskhem katkum ki kyndon ain” la ban jur ka HYC.
Ka HYC ka la kyrpad ruh ïa ki nongshong shnong, khamtam kito kiba sah haki thain khappud ba kin long kiba husiar bad pyntip mardor ïa kano kano ka jingïaid lynti ne jingleh kaba suba sha ki Police Station ba jan tam ne sha ki bor ba dei peit, khnang ba yn lah ban talasi bha ïa ki jingrung beaiñ bad kiwei kiwei ki kam beaiñ.
