Shillong, Rymphang 26: Ka ophis jong u Deputy Commissioner (Excise), East Khasi Hills District kala pynlong ia ka jing khynra kyiad ha kylleng ki jaka bad kala iohkem ia 8 ngut ki nongdie kyiad be-aiñ bad ioh kurup 262.300 litar ka kyiad Pyrsi bad 6.240 litar ka kyiad Phareng ne IMFL.
Ki nongtrei ka tnad Excise kila pynlong ia ka jingkhynra ha u bnai Nohprah 2023 ia ki jaka bam, ki dukan kiba don hapoh ka nongbah Shillong bad ha khap sor bad ha kine ki jingkhynra kila don 12 tylli ki jingjia kiba iadei bad ka jingdie be-aiñ ia ka kyiad.
Ha kitei ki jingkhynra la ioh kurup 262.300 litar ka kyiad Pyrsi bad 6.240 litar ka kyiad IMFL bad la kem ruh iaki 8 ngut hapoh ki kyndon jong ka Excise Act.
