North Lakhimpur, Nailar 16 : Hapdeng ka jingiashim bynta shitrhem jong ki paidbah ha ka ba iadei bad ka jingsieh ia ka lama lai rong ha la ki jong ki iing ki sem, hynrei la lap ruh ia ka jingkaweh ka lama jong ka kynhun seng lehnoh ba la khein beain, ka ULFA (I) hapoh ka steshon rel ha Bogeenadi ha Lakhimpur district ka Assam hynnin ka sngi Nyngkong.
Kane ka la wan long ruh ha ka por ba ka ri baroh kawei ka la rakhe ia ka lyngkhuh snem ka ba 75 ka jingioh jinglaitluid da ka ba pyniasoh ruh ryngkat ka jingialap jong ka sorkar pdeng ban pynieng ia ki lama lai rong ha la ki jong ki iing ki sem.
Ka Assam bad kiwei pat ki jylla ka thain shatei lammihngi (Northeast) ruh ki la sakhi halor ka jingiashim bynta shitrhem jong ki paidbah ha katei ka jingialap ba la pynbna da ka sorkar pdeng.
Ia katei ka lama jong ka seng ULFA (I) la sakhi hapoh ka overbridge jong ka steshon rel, kumba 15 km na ka district headquarter ha North Lakhimpur.
Na ka liang ka kynhun ki heh pulit ki la wan poi ha katei ka steshon bad sdang ruh ban pynlong ia ka jingtohkit halor kane ka bynta.
Ka Seng lehnoh ULFA (I) ha ryngkat ki katto katne kiwei pat ki kynhun seng lehnoh ka thain Northeast ki la khot ban ym iashim bynta ha kane ka jingrakhe laitluid jong ka ri India.
