Agartala, K’lyngkot 07 :U Chairman ka TIPRA Motha u Pradyot Kishore Manikya Debbarma ula iai ban ba ka party jong u kan ym don kano kano ka jingiatehlok bad ka BJP lane bad kiwei pat ki pat ki party sain hima ha kane ka ilekshon assembly ka ban wan.
Haba kren sha ka lad pathai khubor, u Pradyot ula ong ba kiba bun ki briew ki la buh jingkylli la un ia synrop ne em bad ka BJP lane bad ka seng Congress.
“Ngam kwah ia ka pisa jong ka BJP ne ka Congress bad Ngan iakhun ia kane ka ilekshon da kaba pynlut da ka pisa lade.Hadien ka ilekshon ngin khmih mano ban wan bad ngi,” ong u Prodyot lyngba ka lad pathai khubor.
“Ngim kwah satia ia kiba kum kino kino ki jingiasynrop lang.Long kiba la khreh ngin ai ka jingsneng ha ka por kaba biang.Nga la wan ha kane ka taiew ka ban wan.Katto katne na ki nongialam ka party jong ngi ki dang don ha Shillong ban iakynduh ia nga,” ong shuh shuh u Pradyot uba dei ruh u khun syiem ka Tripura.
Nalor kata ula kyrpad ruh ia ki nongshong shnong riewlum ka jylla ba kin ym ngop ha ki jingkular kiba heh haba la wan ka ilekshon, ki jingkular kiba heh kin wan ban pynsngew hynrei hadien ka ilekshon kin ym ai ei ei ruh em.
“Ka lawei ka ban wan jong ngi ka don hapdeng ka jingma.Ki briew kin pyrshang ban thied ia ngi bad halor kata, ngin hap pat ban mad ia ka jingjynjar na ka bynta ki san snem.Ngi dei ban pyrkhat na ka bynta la ki jong ki briew,” ong shuh shuh utei u nongalam ka TIPRA.
Lah ban kdew ba ha ka 27 tarik u Nohprah ba la dep, u Pradyot ula ong ba lada ka long kaba donkam un die ruh bad iala ki jong ki jingdon jingem bad ka iing ka sem ha ka jingialeh kaba khatduh ban pynioh ia ki hok jong ki jaidbynriew trai shnong ka jylla.
