Shillong, Naitung 08: Ka MLA ba shah sospon jong ka Congress, Kong Ampareen Lyngdoh hynne ka sngi thohdieng kala ong ba ka jingjia ba jia ha Orchid Lake Resort, Umiam, kala pyni ia ka dak iapait iapra hapoh ka sem jong ka Bharatiya Janata Party (BJP) ka Jylla.
“I kumba ka don ka jingiapait iapra hapoh ka BJP kaba la iakren paidbah mynta. Jin ba nga dei u Nongialam bala rangbah (senior) jong kano kano ka Party bad kino kino ki ba kham khynnah (Junior) ia nga ki leh bakla, khlem pep ngan ym khot satia ia ki paralok na ki lad pathai khubor ban iathuh ne kynthoh eiei. Ngan ym pynrem iala u jong u para ba iatreilang ha ka rynsan paidbah” ong I Kong Ampareen.
I Kong Ampareen i la kren halor ka jingkynthoh jong u MLA ka BJP na Pynthorumkhrah Bah A.L Hek pyrshah iala u jong u MLA bad Myntri Sorkar Bah Sanbor Shullai halor ka jingjia ba dang she ha Orchid Lake Resort, ha ka jingialang ban lum ia ka jingkyrshan ia ka kyrtong iakhun elekshon President n aka NDA ka Draupadi Murmu.
Haba pynpaw ba kaei kaei kaba jia baroh kala kylla long da kumwei pat, I kong Ampareen ila ong “baroh kito ki jingthet kti la dei ban leh hala ka jong ka Iing. Kane kala pynkulmar jingmut ia nga. Ngan peit ia baroh kine ki jingjia kum ka nuksa ba ngan nym leh satia”.
Haba kyntait ban kynthoh ia ki jingleh u bah Sanbor, ine u MLA ka East Shillong ila ong “Kaei kaba une u MLA u leh ngam lah satia ban kynthoh eiei hynrei lada dei ma nga, ngan da kiar bad ngan jin da burom shuwa ia u khliehduh ka Iingdorbar Thaw Ain”.
Haba pynpaw ba lada shu iakren b aka ILP bad ka Ktien ka thylliem kam dei ka mat kaba hap ha ka jingkhmih ka President ka Ri, I Kong Ampareen ila buh jingkylli “Ngi la shu pyrshang ban ioh eiei shuwa ka elekshon bad ngin sa shu iathet kti bad ong ba ngan don bynta eiei bad ka MDA, ngam don bynta bad ka jingbym ioh ia ka ILP ne jingdawa ban ithuh ia ka Ktien Khasi bad Garo”.
“Ngi dei shibynta jong ka MDA, ngi shim lang ia ka jingkitkhlieh bad ngi dei ruh ban iakmen lang haba ngi ioh ia ka jingjop. Namar kata, phim dei ban jied lane weng na ia ka BJP tag na nga ha ka Iingdorbar Thaw Ain” ila ong.
