Nongpoh, Jylliew 23 : Ka Khasi Jaintia Pig Butcher Association (KJPBA) kala kam ba kala long shngain mynta ban bam ia ka dohsniang hynrei donkam pat ban da shet pynih bha ia ka doh hashuwa ban bam.
Kane ka Seng kala pynpaw ia kane hadien ka jingiakynduh ia ka District Veterinary Officer ka Ri-BhoiDistrict hynne ka sngi Thohdieng ban pan jingshai halor ka jingshngain ban bam doh sniang ha Jylla hadien ka jinglynshop jong ka jingpang African Swine Flu ha kylleng ki District ka Jylla, kaba la ktah ia ka iew jong ki nongshoh bad nongdie doh sniang.
Ki Nongialam ka KJPBA ba kynthup ia u President Bah Boldness Ryngkhlem bad General Secretary Bah Andie Lyngdoh, kila pynpaw ba hadien kane ka jingiakynduh ia kane ka Ophisar, kila ioh jingshai ba kan ym don jingktah satia lada bam ia ka dohsniang kaba la shet pynih bha.
Ki pyntip ba kane ka Ophisar kala pyntip ba ka jingpang African Swine Flu ki sniang kala nang duna hapoh ka Jylla ym shuh kumba long ha ki sngi bala leit noh.
U Bah Andie u iathuh ba kane ka Ophisar kala pyntip ba nangne shakhmat, kino kino kiba wanrah ia ki sniang na shabar ka Jylla ki dei ban da ioh shuwa ia ka syrnot na ki doktor halor ka koit ka khiah jong ki sniang hashuwa ban pynrung shapoh ka Jylla Meghalaya.
Une u Nongialam ka KJPBA ula ther ia ka jingkren u Symbud Myntri Rangbah ka Jylla Bah Prestone Tynsong bap hah husiar ia ki paidbah ban bam dohsniang.
“Namar ki jingkren u Symbud Myntri Rangbah, kala pyntieng ia ki paidbah ban bam doh bad kane kala ktah jur ia ngi kum ki Nongkhaii” ula ong haba buh jingkylli ia u Bah Prestone “Hato kala ju don mo ka jingkem pang jong ki briew lane ka jingiap jong ki briew na ka jingbam ia ka doh sniang ha kine ki sngi ba mynta?”.
Ula pyntip ba ki Doktor ka Veterinary kila pynthikna baka jingpang ki sniang kala duna ha Jylla bad kam don jingktah satia ban bam doh sniang lada iashet ih bha ia ka doh.
U pyntip b aka KJPBA kala dep ban iapynbeit mynta bad ki nongkhaii doh na Assam ba kin buh noh da ki Doktor ha man ki Farm bad hashuwa ban shalan sha Meghalaya, ki dei ban ioh ia ka syrnot na ki doktor ka Assam. “Ki Nongkhaii na Assam kin wan ban wanrah ia ka syrnot banpyni ha ka jaka check ha Byrnihat ba kin peit bniah da ki doktor ka Meghalaya hashuwa ban pyllait ba kin rung sha Jylla”.
Pule lang ia kane: Kem ka ANTF ia 2 ngut ki Nongkhaii droks, kurup heroin ba T. 2 lak
