Kam ka HNLC ba buh bomb IED ha Iew Umsning | Maham jur ia ki riewsain pyrthei

Pynshai ba buh bomb IED hakhmat Iing u Myntri Sorkar barim

Shillong, Risaw 13 : Ka seng bala khein beain Hynniewtrep National Liberation Council (HNLC), ka la shim ia ka jingkitkhlieh kaba pura halor ka jingthmu pynbthei bomb Improvised Explosive Device (IED) ha Iew Umsning, Ri-Bhoi District.

Ha ka kyrwoh bala pyllait ha ka sngi Nyngkong, u General Secretary ka HNLC Bah Sainkupar Nongtraw ula ong ba kane ka kam ka dei kaba leh kum ka “dak ka jingpyrshah” pyrshah ia ka jingiai bteng ban shet kylla ia ka Jaidbynriew da ki riewsainpyrthei bamsap bad ki nongkhaii hehspah kiba ai jaka sah bad pynkupbor ia ki bar jylla ha ka jingduhnong ki briew jong ngi.

Kane ka Seng kala kynnoh ruh ia ki riewsain pyrthei kiba ai jaka sah ia ki bar jylla,pynsuk ia ka jingdie jaka bad kyrshan ia ka bha ka miat ki briew ba nabar bad buh jingma pat ia ka lawei jong ka Hynniewtrep.

“(Ngi) pynmih ia kane ka kyrwoh ban pynkynmaw ia baroh ki Nongmihkhmat paidbah ba mynta bad kiba rim ba ka jingshaniah jong ka Jaidbynriew kam dei ka kabu ban iadie ne khaii. Ka kamram jong man ki nongialam ka long ban iada ia ka khyndew ka shyiap, ka spah mariang, bad ka snap kyrteng ki briew jong ngi ym ban iapein ia ki na ka bynta ka myntoi shimet ne myntoi sain pyrthei” ong u Bah Sainkupar.

“Ngi la peit bniah da ka jingsngewkhia kaba jur ba ki katto katne ki briew hapoh ka kam sain pyrthei ki dang iai bteng ban pyndonkam bakla ia ka kyrdan jong ki da kaba ai jaka sah ia ki nongshong shnong ki bym dei ki riewlum, pynsuk ia ka jingpynkylla jaka, bad kyrshan ia ki jingmyntoi nabar kiba buh jingma ia ka lawei jong u Hynñiewtrep” ula bynrap.

Une u Nongialam ka HNLC ula ong “Ka Jaidbynriew kala iakynduh ia ka jingma kaba khraw bad ba dang iai bteng, ki riew sain pyrthei bamsap kiba die ia ka khyndew ka shyiap jong ngi, ki marpoh khyndew, bad ka jinglong kyrpang jong ngi na ka bynta ka jingkyrshan nabar. Kum kine ki jingshet kylla kim dei satia tang ba ki pheil hynrei ki dei ki kam shet shukor pyrshah ïa ki briew bad ki kpa tymmen jong ngi,”.

U Bah Sainkupar ula pyntip ba ka HNLC kala buh ia u Bomb IED hakhmat ka iingsah u Myntri barim ka Jylla Bah Nehlang Lyngdoh.

Ka HNLC kala maham ba kan sat had madan bad ialeh pyrshah ia kito kiba iasuhbuit bad ki bar jylla, haba pynpaw ba ka bor synshar khadar ka dei ban suhthied ha ka mon jong ki paidbah, ym na ka bynta ban iarap ia ki briew ba nabar.

Kane ka Seng kala kam ruh ba ka don ia ki bor shipai kaba lah ban ialeh pyrshah ia ki riewsain pyrthei ba arsap, kam pher la ki dei kiba bat ia ka bor ne ym bat.

“Ha u 2004, tang shitaiew shuwa ka jingpynbthei bomb ha Them Metor, ngi la buh ia u bomb IED ha ka SP Ophis ha Shillong, bad ieh khlem pynbthei ia u. Ka Tnad Pulit kala jied ban buhrieh ia kane ka jing jia, namar ka jingsngew lehrain jong ki, watla ngi la trei ia ki kam ha ki jaka bym kham rung kham mih ki briew, ngi dang pyni ia ka jinglah ban iohrung bad buh ia u bomb. Ha u 2021, ngi la leh kumjuh ha Khlieh Police Reserve, kaba lam sha ka jingiap hapdeng ki Pulit. Sa shisien, ki bor khmih kila jied ban buhrieh ia ka jingshisha na u paidbah” ula kam.

“Kane ka dei ka jingpynkynmaw kaba khatduh ba ka bor synshar ka dei ban don tynrai ha ka mon jong ki paidbah, ym ha ka liang jong ki briew kiba nabar. Kito kiba dang ïai bteng ban leh pyrshah ïa ki jingmyntoi jong ka Jaidbynriew kin duh noh ïa ka hok ban kam ïa ka jinglong nongïalam hapdeng ki briew jong ngi, bad ka HNLC ka don ïa ka bor shipai ban ïakhun pyrshah ïa kine ki riewsain pyrthei ba arsap, kam pher ki bat ia ka bor ne ym bat” ula pynkut.