Shillong Lber 09: Ka BJP Meghalaya kala kam ba naduh ba shimti u Rikman G Momin kum u President ka BJP Meghalaya, kala sdang ban kiew khamtam haba u Rikman u long uba kloi ban pdiang ia baroh ki dkhot ka seng bad la sakhi ia ka jingrung BJP kumba 90 ngut ki dkhot ka seng Congress ha Khliehriat ha ka sngi plie ia ka ophis treikam jong ka seng ha East Jaintia Hills District ha ka sngi Thohdieng.
Ka BJP Meghalaya kala pynpaw ba hadien jongka jingwan pyniasoh jong u MLA barim ka Salmanpara u Winnerson D Sangma ha kine ki khyndiat sngi bad ka jingwan rung jong ki dkhot ha East Jaintia kala nang pynkhlain ia ka seng bad ha kine ki sngi ban sa wan, yn sa nang sakhi shuh shuh ia ka jingwan rung dkhot ki briew kiba pawkhmat ha ka kam politik.
“Ka don ka jingkhih napoh napoh kaba la nang pynksan ia ki rukom trei jong ka party hadien ba u Rikman G Momin ula jied ia ki nongkitkam kiba trei shitom ban pynkiew ia ka seng. Ym lah ban nujor ba ka seng BJP ka dei ka seng sain hima kaba heh duh ha pyrthei. Ka jingtrei shitrhem jong ka kynhun jong u Rikman ka paw lyngba ka jinglah jongki ban pyniar ia ki shnat treikam jong ka seng ha man la ki constituency” la pynpaw ka kyrwoh jong ka BJP.
‘Nga rung noh sha ka BJP hadien ba nga iohi ia ka jinglah jong ki nongkitkam ka party ban pynsngewthuh sha ki paidbah ia ki skhim bapher bapher jong ka sorkar BJP bad kane ka la pynktik ia ka mynsiem jong nga’ la ong uwei u dkhot ka seng Congress uba rung sha ka BJP.
Katba uwei pat ula ong, ‘Ba ha ki jylla ba synshar ka BJP ka roi ka par kala nang kiew ynda ia nujor bad ka jylla jong ngi bad kala wan ka por ba ki paidbah ka jylla ki dei ban pdiang ia ka BJP kumba pdiang ia kiwei ki National Party namar ka BJP kan sa nang iai synshar ha Delhi hapoh ka jingialam u PM Modi bad kan nym myntoi lada ka jylla jong ngi kam iasnoh kti lang bad ka party’.
U President ka BJP u Rikman Momin ula ong ‘Ki paidbah hi kidei ki nongrah khubor ia ki kambah baka BJP ka leh hapoh ka jingialam u Myntri Rangbah duh ka ri u Narendra Modi ban kyntiew ia ka ri bad ban kham sngewthuh shai ia kiei kiei baroh da kaba iakren bad kito kiba la ioh khiet ia u soh lyngba ki jingiarap ba bun kaba la wan na ki skim u Modi bad shim ruh ia ki jingsngew jong kito kiba la iakynduh bad ki nongkitkam ka party kiei ki jingpynshai ba ki ioh kaba lah ban wanrah jingkylla ha ka jingim jongki’.
