Nongstoin, Naitung 08: Ka Regional Committee iapynbeit pud ka West Khasi Hills, hynnin ka sngi Thohdieng kala rai ban leit jurip ia ki jaka kiba don ha khappud bad ban shimkhia ha ka ban pynsngewthuh ia ki 9 tylli ki shnong kiba kwah ban hap noh ha ka jylla Assam ba kin neh beit hapoh ka jylla Meghalaya.
Ia katei ka rai la shim ha ka jingialang jong ka Regional Committee kaba la long ha Trysem Hall ka Ophis u Deputy Commissioner, West Khasi Hills, Nongstoin, kaba la wan ban iashimbynta da ki Khlieh Nongsynshar Hima, Nongsynshar Shnong ka Langpih Sector bad ki Kynhun Sengbhalang.
Ia kane ka jingialang la pyniaid da u Chairman ka Committee uba dei u Myntri Sorkar Bah Paul Lyngdoh ha ka jingiadon lang ki dkhot ba kynthup ia ar ngut ki MLA u R.G Momin, bad u Bah Renikton Lyngdoh Tongkhar uba long u Chairman barim jongka Committee, u Deputy CEM ka KHADC u Bah Pynshngain N Syiem bad u MDC ka Rambrai u Bah Bajop Pyngrope.
Haba iakren bad ki nongthoh khubor, u Bah Paul Lyngdoh ula ong ba ka jingialang kala iatai sani halor ka kam iapynbeit pud jong ka wat kaba ar bad iathuh ba na ki 52 tylli ki shnong kiba don ha ka thain Langpih, haduh 41 tylli ki shnong kila wan iashim bynta ha ka jingialang bad ai ruh da ka jingthoh ba ki kwah ban don beit hapoh ka jylla Meghalaya hynrei 9 tylli ki shnong kila dep ban pynpaw ha ka Regional Committee kaba rim, ba ki kwah ban don beit noh bad ka jylla Assam.
Ula ong ba ka committee shen kan sa leit bun jurip ia ki shnong ki thaw ha ki thain khappud ban iakynduh iaki paidbah bad hadien kane ka Committee kan sa shong jingialang ban pynkhreh iaka kaiphod.
U Bah Renikton L Tongkhar ula ong, kila don ki shnong ki bym shym la wan sha ka jingialang hynrei ka committee kan leit ban jurip ia ki shnong ki thaw bad kan pynsngewthuh ia ki ba kin neh beit ha Meghalaya bad ka committee kan ym pat pdiang katba kam pat iakynduh iaki paidbah markhmat ban sngap iaka jingpynsngew ka jongki.
U bah Renik u khmih lynti ruh ba yn lah ban pynbeit ia kane ka kam da ka lynti jong ka jingiahunlang bad da ka jingsuk.
U Bah Paul ula ong ba ka Committee kan sa leit ruh ban juriplang bad ka Regional Committee jong ka Assam ha ki thain khappud na ka bynta ban iakren ia ka kam iapynbeit ia u pud u sam.
Pule ruh: Pynshlur ka Tnad Agriculture ia ki jaka tih dewiong ka EJH bad WKH ban phaikhmat sha ka rep ka riang
