Kohima, Risaw 22 : U Myntri Rangbah (CM) ka Nagaland u Neiphiu Rio ula ong ba kam don satia kano kano ka jingbakla ha kaba iadei bad ka jingdawa jong ki nongshong shnong ka thain mihngi ka Nagaland ban ioh noh la ka jong ka jylla.
Ka thain mihngi ka Nagaland ka kynthup ia ki hynriew tylli ki district, ka Mon, Tuensang, Kiphire, Longleng, Noklak bad Shamator.
Ki nongshong shnong kiba dei na ki hynniew tylli ki jaitbynriew riewlum kiba kynthup ia ki Chang, Khiamniungan, Konyak, Phom, Sangtam, Tikhir bad Yimkhiung ki dei kiba shong shnong ha kane ka thain mihngi ka Nagaland.
“Ngi ki Naga ngi dei ban sngewthuh halor kane.Kam long kaba bakla na ka bynta jong ki (Ki nongshong shnong ka thain mihngi ka Nagaland) ba kin pynpaw iala ki jong ki jingangnud,” ong u CM Neiphiu Rio.
Na ka liang u CM ka Nagaland ula pyntip ruh ba na ka liang ka sorkar jylla ka dang pynlong ia ka jingiakren bad ka seng Eastern Nagaland Peoples’ Organisation (ENPO) halor katei ka jingdawa ka jong ki ban ioh noh la ka jong ka jylla.
“Ngi la pynlong ka jingiakren bad ki bad ngin buh sngi bad ka ENPO ha ka por ka jingwan jngoh jong u Myntri kam pohiing sha kane ka jylla,” ong u CM Neiphiu Rio.
Lah ban kdew ba ka ENPO kala pynbna ia ka rai ban ym iashim bynta ha ka tamasa “Hornbill Festival 2022,” shi bynta ban pynbor halor kane ka jingdawa ka jong ki ban ioh la la jong ka jylla ia kaba yn tip kum ka ‘Frontier Nagaland.’
Ka ENPO kala kyntu ruh ia ki 20 ngut ki nongmihkhmat na ka thain mihngi ka Nagaland ba kin iehnoh kam kum ki MLA.
Shuh shuh ka ENPO kala pynbna ruh ba kin ym iashim bynta satia ha kino kino ki ilekshon, kaba kaba kynthup ha ka ilekshon assembly ka ban long ha u 2023 tad haduh ba kane ka jingdawa ka jong ki kan urlong.
