Shillong, Jymmang 28 : U Nongaibuit ka Tnad Pule Puthi Bah Himalaya M Shangpliang ula pynpaw ba ka Sorkar kan ym map satia ia kino kino kiba donkti ha ka jingpyndonkam bakla ia ka pisa jong ka Mid Day Meal-kaba dei ban hok jong ki khynnah skul.
Kane ka jingkynthoh u Bah Hima uba dei ruh u MLA barim ka Mawsynram, kala mih halor ka jingkynnoh jah rngai ka skhim Mid Day Meal jong ka skul Dangar Dombah Border Upper Primary School-kaba la iaid da ki phew snem, ia kaba la kynnoh ba ia ka pisa la bam klop marwei da u Secretary barim ka Managing Committee ka skul.
U Bah Hima ula pynpaw ia ka jingsngewkhia halor kane ka jingpyndonkam bakla ia ka hok ki khynnah skul bad ong ba ka Sorkar kan ym map satia ia ki briew kiba donkti.
“Ka Tnad Pule Puthi kala phah jurip bad tohkit ia kane ka jingjia bad shen kan sa shim ia ki sienjam ban leh eiei pyrshah ia ki briew kiba donkti” ula ong.
Une u MLA barim ka Mawsynram ula leit iuhkjat ha kane ka skul bad ula aiti ia ka work order ba T.4.50 lak sha u President ba thymmai jong ka Managing Committee, kaba la pynioh lyngba ka Chief Minister Special Development Fund (CMSDF). Kane ka work order ka dei na ka bynta ban shna ia ka jaka leit bar ia ki khynnah skul bad ki nonghikai.
U Bah Hima ula pynpaw ia ka jingbynniaw ba ka skulk aba la kynjoh sha ka 40 snem ha ka jingiaid lynti ban shakri ia ki khynnah ka thain Khappud, kam pat don satia ia ka jaka leit bar.
“Hadien ba nga ioh ia ka khubor ba ki khynnah skul ki hap leitbar sha ki khlaw ki btap, nga la leit pynsngew sha u Myntri Rangbah Conrad K Sangma bad hangto hangto hi, ula mang ia ka song pisa ba T.4.50 lak ban shna noh ia ka jaka leit bar” ula iathuh.
Ka Principal ka skul Kong Bel Marbaniang bad ka Secretary ba thymmai ka skul, kila pynpaw ia ka jingsngewnguh ia u Bah Himalaya uba la kloi ban iarap da kaba pynioh ia kane ka song pisa.
