Shillong, Jymmang 06: U Symbud Myntri Rangbah ka Jylla Bah Prestone Tynsong hynne ka sngi Ba-ar, ula ong ba ka sorkar jylla kan sa shim ia ka rai kaba khatduh halor ka jingthmu ban wanrah lynti rel ha ka jylla tang hadien ba la dep ban iasyllok shwa ba ki kynhun bapher bapher.
U Bah Prestone Tynsong haba iakren bad ki nongthoh khubor ula ong ba u Myntri ka Sorkar Pdeng ula kren ia kaba dei ba ka sorkar India ka thrang ban pyniasoh ia ka jylla Meghalaya da ka lynti rel.
“Ia kane ym dei ba leh na ka bynta ka jingmyntoi shimet jongngo jongno hynrei kadei na ka bynta ka jingmyntoi jong ki paidbah ka jylla,” ula ong.
Ula pyntip ba u Myntri Rangbah ka Jylla ula dep ban thaw ia ka All Party Committee bad shen yn sa lum ia ka jingialang bad baroh kiba donbynta ban plie lad ia ka jingiakren kaba laitluid hashwa ban shim ia kano kano ka rai.
“Nga shimet hi, nga sngew ba ngi donkam ia ka rel. Tangba kam mut pat tangba nga kyrshan, kadei ban iaid shakhmat khlem kano kano ka jingioh ia ka jingmynjur lang. Ngi dei ban shim bad kynthup ia baroh lang” ula ong.
Halor ka jingkylli la ka sorkar ka don jingthmu ban sdang shwa da ki rel kit mar, u Bah Prestone ula ong “Ai ba ngin iakynduh shwa. Tang hadien jong ka jingialang bad ka jingiaken ngin sa sngewthuh ia katei ka mat bad ngin sa shim ia ka rai la ngi dei ne em ban iaid shakhmat bad katei ka projek”.
Ula banjur ruh ia ka jingdonkam ban don ia ki atiar kiba khlain ban tehlakam ia ka jingwan rung kyrthep ki briew kiba nabar lada wanrah ia ka rel.
U Bah Prestone ula ong ba ka sorkar ka iengskhem ba dei ban pyntreikam ia ka
Inner Line Permit (ILP) ha ka jylla.
“Ka sorkar ka ai jingkyrshan pura ia ka ILP. Ka iingdorbar thawain ka jylla ka lah dep mynjur ia ka Resolution bad ngi kwah ba dei ban pyntreikam noh ia ka. Ha kajuh ka por, ngin sa iatai bad iasyllok ia ka jingpyniasoh ia ka rel bad ia ki mat kiba baroh ki don ia ka jingsngewkhia” ula ong.
U Bah Prestone ym shim la treh ban kren eiei ha kaba iadei bad ka rai jong ka seng Voice of the People Party (VPP) ban ym leit iashimbynta ha ka jingialang jong ka All Party Meeting ban iakren halor ka rel.
