Shillong, Lber 12 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar kan ai da ka jingpynsajia kaba tyngeh ia ki briew kiba donkti ha lyndet ka jingpynbthei bomb IED ha Them Iew Mawlong, myn ha ka miet 9 tarik Lber.
“…la bun ngut ki briew kila shah kem mynta bad la ai ka jingpynshitom ba tyngeh ia ki. Kumba nga ong, ngin pynthikna ba ki briew, kiba donkti kin shah kem lut” ong u Conrad haba iakren bad ki nongthoh khubor.
Ula ong ba ka Tnad Pulit kala treikam sted bha halor ka jingioh lum khubor syntiat bad ka jingpyn donkam ia ki kor ka juk ba mynta.
“Ki pulit ki dang pynlong ia ka jingtohkit bad bun ngut ki briew kila shah kem bad wat hynnin ka miet, la pyntip sha nga ba haduh ka por 12 baje mynmiet, nga ioh phone call na ki heh Pulit ba pyntip ia nga halor ki sienjam bapher bapher bala shim bad kumta, nga la peit pyrman bha ia ka jinglong jingman” ula bynrap.
Haba kylli la ka Sorkar kan dang bteng ban shong iakren iasuk lad aka HNLC ka donkti ha kane ka jingpynbthei bomb, u Conrad ula ong ba kane ka dang dei tang ka jingantad hynrei ngin sa peit bad lap mano ba donkti.
“Hadien ba ngi la lah ban pynthikna ryngkat bad ki sakhi satar, ngin sa lah ban ai ka jingkren aiu ba ngi rai” ula ong.
“Hooid, ki don katto katne ki kam ba ngi lah jam shakhmat. Ngi la leh ia ka jingwad bniah, jingtohkit bad kiwei kiwei bad ki khubor ba ngi ioh lum ki pyntip ba ki don ki briew bad kynhun hynrei khlem ki jingtip kiba bniah bad ba pura, kam long kaba bha ia nga ban kren eiei mynta” ula bynrap.
Ha ka miet sngi U Blei, arngut ki briew kynthup u Nongialam ka HNYF ula shah kem halor ka jingkynnoh donkti ha ka jingpynbthei bomb IED ha Them Iew Mawlong. Kine ki kyrteng u Tarson Lymba uba dei Disciplinary Secretary ka HNYF bad u Ebakordor Nongpluh.
Hynnin ka miet, ki Pulit kila kem sa 4 ngut ki briew na Ri-Bhoi District bad ioh kurup ruh ia u bomb IED u bym pat pynbthei.
