Shillong, Lber 12: Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar jong u, da lei lei ruh kan ym shah satia ia ka jingtih Uranium hapoh ka Jylla Meghalaya.
Kane ka jingkynthoh jong u kala mih hadien ba kawei ka seng bala tip kum ka North East Sunshine Trust (India) kala thoh sha Delhi ban sdang biang ia ka project tih uranium ha Meghalaya.
“Kino kino ki seng ki lah ban thoh, ngam lah ban khang ia ki seng ba kin thoh sha ka Sorkar India hynrei kane kam mut pat ba ka dei ka nongrim ba ieng da ka Sorkar Jylla” ong u Conrad haba iakren bad ki nongthoh khubor.
“Ngi la kren shai ba khlem ka jingmynjur lang ki paidbah, khlem da khmih lang ia baroh ki kam ba iadei bad ka saian, ngin ym shah satia ban tih uranium ha ka Jylla jong ngi” ula ong.
U Myntri Rangbah ula ong ba ka nongrim jong ka Sorkar Jylla kala shai bha halor kane ka kam naba “Ka dei ka kam iap kami m u paidbah, ka dei ia ka koit ka khiah u paidbah bad ka dei ia ka lawei jong ka Jylla jong ngi”.
“Ki lah ban don ki jingsngewkhia na ki riew shimet, kiba lah ban kwah ia kane bad don ruh kiba kwah ban pyniaid shakhmat ia kan, ka dei ia kaban hap pynbeit ha ka lynti kaba jai jai bha namar kumba nga ong, ngi hap ban shim lem ia ka jingmynjur u paidbah, ngi hap ban da pule bniah ia ki jingktah jong kine ki kam bad dei hadien kine kiei kiei, ngi hap ban pynthikna ba ym dei ban shim ia ki sienjam ha kane ka lynti (ban tih) namar kumba nga ong, ka dei ka kam ba ktah ia ka iap k aim u paidbah bad ka lawei ki briew jong ngi” ula bynrap.
Shuh shuh, u Myntri Rangbah ka Jylla ula pyntip ba kam shym la don satia kano kano ka jingphah ktien ne ka jingthoh n aka Sorkar Pdeng sha ka Jylla haba iadei bad ka kam tih Uranium.
