Shillong , Risaw 05: U Symbud Myntri Rangbah ka jylla Bah Sniawbhalang Dhar uba khmih ruh iaka tnad Pynroi Sor, hynne ka sngi Palei, ula pyntip ba ka jingpyntrei iaka Smart City Project kala iaid bha shakhmat hapoh ka Jylla.
U Bah Sniawbhalang Dhar ula ong ba ka Smart City Project kaba kynthup ia ki 17 projects kala iaid shaid shaid bha bad ha kaba iadei bad ka Integrated Command and Control Centre (ICCC) dei ban pyndep noh hapoh jong u Lber 2024.
Ula ong, shisien ba la pyndep ia katei ka project, yn sa sdang noh ia ka jingpyntreikam.
“Ia kiwei pat ki projek ngi dei ban lah ban pyndep noh hapoh u bnai Jylliew 2024 bad mynta hi ngi dang pyrshang katba lah ban leh ia kane. Ki katto katne ki projek lyngba ka Smart City Project ki kynthup iaka Iew Laitumkhrah, Iew Polo, ki Parking Lot kiba heh, Smart Road bad kiwei kiwei bad baroh ki long 17 tylli ki project” ong u Bah Dhar.
Ha kaba iadei bad ka jingdheng kali, u Symbud Myntri Rangbah ula ong, shisien ba la dep ban pynkynriah ia ka Main Secretariat sha New Shillong Township, kaban shim por sa kumba 2-3 snem, hynrei kan sa iarap shibun ban pynduna iaka jingdheng kali.
“Ka jingpyntreikam da ka ‘Odd bad Even’ ia ka jingpyniaid ia ki kali kala long ka jingeh, Ngi hap ban sngap iaka sur bad jingpynsngew jong ki paidbah, hynrei ngi dang iaid ha katei ka bynta bad dang shen ngi la shong jingialang bad ka Deputy Commissioner ruh,” ong u Bah Dhar.
Ula ong, shisien ba la dep ban tei iaki jaka pynieng kali ne Parking Lot, la khmih lynti ba kin pynduna khyndiat iaka jingdheng kali khamtam haba bun ki paidbah ki ju pynieng ia ki kali ha kat kaba lap ba shem ha ki bynta jong ki surok.
Haba kylli la ka sorkar jylla ka don jingthmu ban ai jingiarap pisa ia ki riewshimet kiba thmu ban tei iaki Parking Lot ha ki jaka ki jongki kiba don ha nongbah Shillong, u Symbud MyntriRangbah ula ong, ba kam shym la don kano kano ka polisi treikam halor kane ka bynta hynrei ka sorkar ka lah ban khmih bniah bad ban phaikhmat ia kane ka bynta.
