Shillong, Nohprah 04: U President ka Meghalaya Pradesh Congress Committee (MPCC) u Bah Vincent H. Pala ula ong, ba ka seng Congress kam dei satia ka jaka theh niut na ka bynta kito kiba thmu ban pyniasoh ne ban wan phai biang. Ula banjur ba kito kiba kwah ban wanphai biang sha ka seng kidei ban ioh jingbit shwa na ki nongialam jongka All India Congress Committee (AICC) ban pynthikna ia ka jinglong hok bad ban pynneh ia ka burom jong ka seng.
“Bun ki briew haba kila mih noh na ka seng, kila kynthoh pyrshah ia ki nongialam bad ia baroh. Haba kila rai ban wanphai biang, ngi donkam ban ioh jingbit shwa na Delhi. Kam dei satia ba uno uno u lah ban rung sha ka seng” ong u Bah Pala bad ka bynrap “Ngi hap ban khmih bniah bha ban pynthikna ba kano kano ka rai kan ym ktah ia ka seng”.
U Bah Pala ula pyrto ia ka jingtrei shitom jong ki nongialam ka Congress kiba dang don beit ha ka seng wat ha ki por kiba eh bad jynjar bha bad ula banjur ia ka jingdonkam ban don ia ka jingpynneh ryntih ia ka jingwan rung kiba thymmai bad ka jingburom ia ki dkhot kiba la don lypa.
“Ki briew ki jong ngi kiba la trei shitom bha ha ki 4-5 snem ki dei ban ioh ia ka lad. Kito kiba thmu ban pyniasoh bad ngi kidei ban ioh ia ka burom. Ka thong ka long ban iatreilang na ka bynta ka bha ka miat jong ka seng, da kaba ia khlehlang ia ki dkhot kiba rim bad kiba thymmai bad ban pynneh ia ka jinglong jingman jong ka seng” la ong u President ka MPCC.
Haba jubab ïa ki jingkynnoh na ki dkhot barim ha kaba ïadei bad ki jingbakla ha ka rukom treikam hapoh ka jingïalam jongu, u Bah Pala ula kyntait ïa kitei ki jingkynnoh da kaba ong, “Lada don kano kano ka jingjia kaba kyrpang, nga lah ban pynbeit ia ka. Hynrei ha ka jingkynmaw ka jong nga, ia ki Block bad District President la jied hi da ki dkhot. Kum ka nuksa, ha Mawhati, haba u MLA ula mih noh, ngi la ap katto katne por shwa ban pynbeit thymmai ia ka Block. Ki nongpeit pyrman bad ki nongpyniaid kila leh ia kaba donkam hashwa ban thung kam”.
Ula kubur pat ba ula lah ban don ia ki jingbakla da kaba ong, “Nga dei u briew bad nga lah ban leh bakla, hynrei bunsien nga lah long uba husiar bad phikir bha haba jied ia ki nongialam ha ki Block ne District”.
U Bah Pala ula ïakren ruh halor ka buit treikam jong ka Seng Congress na ka bynta ka elekshon Autonomous District Council (ADC) ban wan, ha kaba kin sa shim ïa ki rai kiba kongsan.
“Ngi dang pynkhreh da ka buit treikam na ka bynta ka elekshon MDC. Hapoh shi taiew, ngin sa shim ïa ki rai kiba kongsan ban pynthikna ba ka nam jong ka Seng bad ki nongïalam kan dang neh” ula ong.
“Nyngkong eh, ngi la khot ia ki aplikeshon na baroh ki Block. Yn aiti ia bun tylli ki kyrteng bad ngi thmu ban pynbna noh ia ka kyrteng jong ki kyrtong hashwa ka Khristmas. Ngi la ai jinghikai ia ki kyrtong kiba thymmai bad ki dkhot jong ki Block. Ki MDC bad ki MLA ki don ia ki bynta bapher bapher, kumta ngi la btin ïa ki ba kin pynleit jingmut ha ki mat kiba kongsan, ban kiar ban ai ia kino kino ki jingkren ki bym donkam bad ban long kiba bat iala ka akor ka burom” la ong u nongialam ka Seng Congress
U Bah Pala ula banjur ba ka Congress ka thmu ban pynleit jingmut ha ki mat kiba kongsan khlem da kynnoh ne kynthoh pyrshah ia kiwei pat.
“Ngi kwah ban pynleit jingmut ha ki mat jong ka District Council, ban don hapoh u pud u sam bad ban kiar na kaba iaid palat ia u pud. Kane kadei shi bynta jong ka jingai jinghikai ka jong ngi ia ki kyrtong ki jong ka seng Congress” la pynkut u Bah Pala.
 u Bah Vincent H. Pala ula ong, ba ka seng Congress kam dei satia ka jaka theh niut na ka bynta kito kiba thmu ban pyniasoh ne ban wan phai biang. Ula banjur ba kito kiba kwah ban wanphai biang sha ka seng kidei ban ioh jingbit shwa na ki nongialam jongka All India Congress Committee (AICC) ban pynthikna ia ka jinglong hok bad ban pynneh ia ka burom jong ka seng.){kind=link}