Agartala, Naiwieng 14 :U nong seng jong ka Hamro Sikkim Party uba dei ruh u kapten barim jong ka kynhun ialehkai football ka India, u Bhaichung Bhutia ula kam ba ki party riewlum ne regional party kila shim ia ki bynta kiba kongsan ha kaba iadei bad ki jingdawa jong ki paidbah hapoh ka national level.
Haba aijingkren ha ka jingialang paidbah jong ka TIPRA Motha ha Agartala, u Baichung ula ong ba ula thikna ba u Pradyot Kishore Manikya Debbarma un trei na ka bynta ka roi ka par jong ka jylla ha baroh ki liang.
“Mynta Nga la wan hangne na Sikkim ban ai ka jingkyrshan ia u Pradyot bad ia kaparty TIPRA Motha.Nga la ithuh ia u Pradyot hashwa ba un rung sha ki kam sain hima.Mynta ula iashim bynta ha ki kam sain hima ym na ka bynta ka pisa na ka kyrdan, hynrei na ka bynta ka bha ka miat jong ki nongshong shnong kiba dei ki trai shnong riewlum ka Tripura.Kiba bun ki national party kila synshar ia ka Tripura, hynrei mynta kala dei ka por ia ki party riewlum ba kin synshar ia kane ka jylla ha u 2023.Nga lah ban pynthikna ba u Pradyot un trei na ka bynta ka roi ka par jong baroh,” ong u Bhaichung.
“Nga ruh nga la seng ia ka party riewlum hapoh Sikkim.Ki party riewlum ki don ia ka bynta kaba kongsan ha kaban rah ia ki mat jingdawa jong ki paidbah hapoh ki national level.Ki party kiba kum mangi ki ieng skhem ha ryngkat u paidbah ha baroh ki khep kiba kongsan bad kim ju shukor ia u paidbah kiba ai ha ngi ia ka jingieit bad ka jingkyrshan,” ong shuh shuh utei u khlur ialehkai football barim ka India.
Lah ban kdew ba ha ka jingpynkhreh ia ka ilekshon assembly ka ban long ha u 2023 ha Tripura, u chairman ka TIPRA Motha uba dei ruh u khun syiem ka Tripura, u Pradyot Kishore Manikya Debbarma ula ong ba u lah ban aiti la ka jingim hynrei un ym ia pein na ka bynta ki 13 lak ngut ki trai shnong riewlum ka jylla.
U Pradyot ula ai ia ka jingkren ha kane ka jingialang kaba la long ha Swami Vivekananda Maidan ha Agartala ha kaba da ki phew hajar ngut ki nongtrei bad ki nongkyrshan na ki bynta bapher bapher ka jylla kila wan ban iashim bynta.
