Shillong, Naiwieng 14 : Ka Meghalaya kala khyllie ia ka jingioh takma naka Athletic da ka jingioh ban khur haduh 5 tylli ki takma ksiar ha ka 2nd North East Olympic Games ba long ha SAI Training Centre, NEHU hynnin ka sngi U Blei.
Ha ka jingialehkai Atheltic, ka Meghalaya kala ioh ban khur bun eh ki takma ksiar ban ha kiwei kiwei ki jait jingialehkai lada khein lang baroh. Ka Jylla kala ioh ruh ia kawei ka takma rupa bad artylli ki takma rnong.
Ha kajuh ka por, ka Assam kala ioh 3 tylli ki takma ksiar bad kawei ka takma rupa katba ka Manipur kala ioh artylli ki takma ksiar bad artylli ki rnong. Ka Tripura kala ioh artylli ki rupa bad kawei ka rnong, ka Sikkim kala ioh kawei ka rupa, ka Mizoram kawei ka rupa, ka Nagaland lai tyli ki rnong bad ka Arunachal kala ioh kawei ka rnong.
Ka Melibad Kro kala pynioh ia ka takma ksiar ia ka Meghalaya ha ka U-20 Women Javelin katba u Marso Kyndait ula ioh ia ka takma ksiar ha ka jingiakop mareh jong ki shynrang ba palat 20 snem.
U Skhemlang Suba uba la rah da ka jingsarong ia ka lama jong ka Meghalaya ha ka Opening Ceremony (jingialang otribon) ha kane ka juh ka madan, ula ioh ia ka takma ksiar bad ha kane ka kynti kala wan n aka jingiakop mareh U-20 jong ki shynrang ba 800 meter.
Ha ka jingiakop mareh 400 meter jong ki Kynthei ba palat 20 snem, ka Gloryfy Kurbah kala ioh ia ka takma skier bad u Daniel Wahlang ula ioh ia kane ka juh ka takma ha ka jingiakop mareh ba 10000 meter jong ki shynrang ba palat 20 snem.
Kiwei pat kiba la ioh ia ki takma ksiar ki dei u M Al Ken Singh ka Manipur (Above-20 men’s 400m), N Chaoba Devi ka Manipur (Above-20 women’s 1500m), Arupjyoti Gogoi ka Assam (U-20 boys’ 100m), Laimwn Narzary ka Assam (Above-20 women’s high jump) bad Manoj Swarginari (Above-20 men’s javelin).
