Shillong Jymmang 02: Ka phlim Jaintia kaba la tip kum “Ka Chithi,” ia kaba ki paidbah ki la khmih lynti bha ban ioh peit noh, kan sa urlong noh shen ha kaba ia kane ka phlim yn pyni paidbah ha ka 7 tarik u Jymmang ha Soso Tham Auditorium Shillong.
Ia kane ka phlim yn sdang pyni naduh ka 7 haduh ka 12 tarik u Jymmang ha ka por 2 baje mynsngi, 4:15 nohphai sngi bad 6:30 janmiet.
Ia katei ka phlim ka shna bad pynwandur da ka nongshna phlim kaba pawnam ka Kong Simi Khongtiang bad “Ka Chithi” kala ioh bun tylli ki jingithuh ha kylleng jong ka ri.
Kane ka phlim kala ioh ia ka Best Director Award ha ka Prag Cine Awards bad la pyni ruh ha ka Bengaluru International Film Festival bad ha ka North East International Film Festival ha Imphal.
La khmih lynti ruh ba kane ka phlim kan khring ia ki nongpeitkai ha kaba yn pyni ia ka ha ka Habitat International Film Festival kaban sa long ha Nongbah Delhi.
“Ka Chithi” kadei ka phlim kaba bun kila iakren ia khana bha khamtam haba kane ka phlim na Jaintia kadei kaba la khring ia ki nongpeitkai ha kylleng ki tamasa pyni phlim.
Ka Kong Simi Khongtiang kala kyrpad ia ki paid nongieid phlim ba kin ai ka jingkyrshan da kaba wan peitkai ia kane ka phlim.
Ka Kong Simi kala ai khublei ruh ia ka jingai jingkyrshan jong u Myntri ka tnad Arts and Culture, ha kaba ka sorkar kala shim ia ki sienjam ha kaban kyrshan ia ki nongshna phlim ha ka jylla.
Kala iaroh ia ka rai ban pyni ia katei ka phlim ha Soso Tham Auditorium, ban ithuh ia ki jingeh bad jingtynjuh jong ki nongshna phlim ha ka jylla ban ioh ia ki jaka ban pyni ia ki phlim ki jongki.
Ka jingpyni ia ka phlim “Ka Chithi” kan kyntiew shaprang ia ka kam shna phlim ha rilum Jaintia ryngkat bad ka jingkular ka sorkar ban ai jingkyrshan halor kane ka kam.
Ka jingthmu ban buh ia ka Cineplex ha Soso Tham Auditorium kan kyntiew bad kan pyniaid shakhmat ia ki kam shna phlim da ki nongshna phlim kiba don ha ka jylla.
