Kohima, Nailar 13 :U Myntri Rangbah (CM) ka Nagaland, u ba dei ruh u nongialam jong ka Nationalist Democratic Progressive Party, u Neiphiu Rio hynnin ka sngi Thohdieng u la ong ba ka party ka jong u kan ym synrop lang bad ka seng BJP.
Ha ba kren sha ki lad pathai khubor, u Rio u la ong ba ka BJP ka dei ka paralok jong ka NDPP ha ka jingpynlong ia ki ilekshon naduh ka snem 2017, hynrei kam don satia ka jingkylli ba ka party kan ia synrop lang bad ka BJP.
Ia kane u CM ka Nagaland u la jubab halor ka jingkynnoh u president ka seng Congress ka Nagaland u K Therie u ba la ong ba ka party NDPP ka la pynkhreh ban ia synrop lang bad ka BJP hadien ka ilekshon Assembly ka ban long ha u 2023.
“Nga lane kiwei pat ki nongialam ka NDPP ngim ju kren ei ei ha ka ba iadei bad ka jingthmu ban pyniasoh ia ka NDPP bad ka BJP.Ka Congress ka la shna hi ia ki khana ki bym don nongrim.Kim don da kiwei pat ki jingkylli halor ka jinglong khuid ka party ka jong ngi,” ong u CM ka Nagaland.
