Shillong, Lber 13 : U Myntri Rangbah ka Jylla Conrad K Sangma, ula ong ba ka ioh ka kot jong ka Jylla kan kiew ha ka jingmut kaba shisha lada ki samla, ki kynthei, ki nongrep, ki nongsengkam bad baroh ki dkhot ka imlang sahlang ki don bynta lang ha kane ka jingpynkiew.
U Conrad ula kren ia kane ha ka CM Elevate Conclave na ka bynta ki nongsengkam ka Ri-Lum Garo kaba long hynne ka sngi Balang ha District Auditorium, Tura, ha ka jingiadonlang u Symbud Lamphang Timothy D Shura, ki Myntri Sorkar bad ka MP Lok Sabha Agatha K Sangma.
Haba ai jingkren, u Myntri Rangbah ula ong ba ka Sorkar Jylla ka don ia ka mishon bad ka jingiohi jngai ban kynjoh ia ka 10 billion US dollar economy hapoh u snem 2028 bad ban pyniaryngkat kyrdan ruh ia ka Jylla bad kiwei kiwei ki Jylla bala kiew shaphrang hapoh ka Ri.
“Lada ngim jam shakhmat da kane ka thong, ngin ym lah satia ban kiew bad roi lane ba ka ioh ka kot jong ngi kan kiew” ula ong.
Ula pyntip ba ha kine ki shisnem shiteng bala leit, ka ioh ka kot jong ka Jylla kala kiew na ka T.45 hajar klur sha ka T. 56 hajar klur haba ban jur ia ka jingdonkam ban pynkhlain ia ka jingkynshew kam bad ka jingpynlut ban lah pynkhlain ia ka ioh ka kot.
U Myntri Rangbah u pyntip ba lyngba ki skhim bapher bapher jong ka CM Elevate program, ki nongioh jingmyntoi kin ioh haduh 50% ka subsidy lane palat na ka jinglut jingsep jong ka project.
Ula pyntip ba ka CM Elevate Program kan iai bteng manla u snem bad kyntu ia ki samla ba kin shim kabu ia ki jingmyntoi ba kin ioh na kane ka prokram.
U Conrad ula kren ruh halor ka Floriculture Mission kaba la pyllait dang shen bad ong ba kane ka Mission kan pynkhlain ia ka kam rep syntiew hapoh ka Jylla.
Ula pyntip ruh ba ka IT Park ha Tura ia kaba la dep ban ai work order, kan lah ban pynioh kam haduh 5000 ngutki samla ka Tura bad ka ri lum Garo baroh kawei.
Ha kane ka sngi u Myntri Rangbah ula sam ruh ia ka shithi thungkam ia ki Village Data Volunteers bad aiti ia ka work order jong ka Bio-mining ha ka jaka bret niut ka sor Tura, kaba don ha Rongkhon Songital.
Nalor kine, ula sam ruh ia ki shithi pyllait song pisa sha ki nongioh jingmyntoi jong ki Agri-Response Vehicles, Agri-Warehouse, Common Facility Centre, Piggery, Poultry bad Goat Farming schemes hapoh ka CM Elevate bad ki sanction letters hapoh ka Floriculture Mission.
