Shillong, Nailur 30 : Ka Mawlai Sports Club ka la ioh ban phong ia ka pansngiat kum ka lahduh ha ka lympung ialehkai Jong ka Shillong Premier League hadien ba ka la lah ban wan ha khlieh duh jong ka miej iakhein point jong katei ka lympung ialehkai.
Ka jingiakhun ba 56 kaba dei ruh ka jingiakhun ba khatduh ha katei ka lympung ka la kut hadien ba ka Mawlai ka la ioh ban pynliem ia ka Langsning da 2-1 kol ha ka jingiakhun kaba long ha madan Third Ground Polo.
Ha katei ka sngi pynhap pyrda kaba dei ruh ka smgi sam ia ki khusnam sha ka lahduh bad kiwei ki kynhun la donlang ruh u myntri ka tnad Sports and Youth Affairs ka jylla Bah Banteidor Lyngdoh. lah ban kdew hangne ba ka Mawlai ka la pyntikna ba kan khur ia ka nam lahduh naduh ka 09tarik u Nailur mynta u snem.
U Myntri ha kane ka sngi u la pynbna ruh ba katei ka lpung ba sdang naduh 15tarik Jylliew la pynhap pyrda ha katei ka sngi.
Ka Mawlai kum ka lahduh ka la ioh ban khur ia ka song pisa ba 3lak tyngka. La donlang ruh ha katei ka sngi naduh u president ka Shillong Sports Association, Bah Eugeneson Lyngdoh MLA nalor kiwei ki nongialam ka SSA kaba Pynïaid ia katei ka lympung.
Ka Langsning kaba mad ia ka nam rem ha katei ka sngi ka la hiar sha kyrdan ba lai kaba mut ba ia ka kyrdan ba ar la ioh da ka Rangdajied United FC kaba ioh ia ka song pisa ba 1lak tyngka.
Ha katei ka lympung kaba la pynlong biang hadien Arsnem na ka daw ka khlam covid la don haduh 166 tylli ki kol ba ioh thep da ki 75 ngut ki rangthep kol.
