Shillong, Nailar 27: Ka Sorkar Jylla kala tyrwa ban pyntreikam ia ka Meghalaya Journalist Welfare Scheme 2024.
Ia kane la pyntip da ka Myntri ka Tnad Information and Public Relation Kong Ampareen Lyngdoh haba jubab ia ka jingkylli bala wanrah da u MLA ka BJP na South Shillong Bah Sanbor Shullai, uba dawa ia ka jingdonkam ban kyntiew ia ka Journatist Welfare Fund da 100% hapoh ka Iingdorbar.
Ka Kong Ampareen kala kubur ba ka Journalist Welfare Scheme 2009 ka dei kaba la rim haba ianujor bad kiwei ki Jylla, kiba la nang pynhreh bun shah haba iadei bad ki lad ai jingiarap ia ki nongthoh khubor.
“Kumta, ngi la nang pynkhreh mynta ban tyrwa ia ka Meghalaya Journalist Scheme 2024, ka ba dang sdang haka jingpynkhreh” kala ong.
Ha kane ka skhim thymmai, ka Myntri ka pyntip ba ka Sorkar kala tyrwa ban pynkiew ia ka Journalist Fund sha ka T.35 lak haba shim ba ka T.5 lak (corpus fund) ka dei kaba rit palat.
“Ka dei kaba kiew haduh 500% (lada jia ka jingiap ki nongthoh khubor) katba ka song pisa na ka bynta ban sumar lada pang kan kiew na ka T. 50,000 sha ka T. 3 lak” kala ong.
“Ngi pynshlur ia ki nongthoh khubor ba kin register ialade ha ka Meghalaya Health Insurance Scheme (MHIS). Ngi la tyrwa ruh ia ki lad jingsumar ba khlem siew pisa ia ki nongthoh khubor hynrei kine baroh ki don dei tang ha ka jingtyrwa” kala bynrap.
Haba kdew ia ka Jylla ba marjam kum ka Assam, kaba la ai ia ka bai bam tynmen ia ki nongthoh khubor bala shongthait, ka kong Ampareen kala pyntip ba kane ka kam ruh ka dang don hapdeng ka jingpynkhreh.
Nalor kane, ka Myntri kala ong ba ka dei ka jingshisha ba katto katne ki nongthoh khubor kila mad ia ki jingeh namar ka jingbym ioh ia ka jingsiew ba thikna.
“Ngi sngewkhia ia kane hynrei ki nongthoh khubor ki dei kiba la thungkam da ki riew shimet” kala ong.
Kat kum ka jingong jongka, ka Sorkar kala shim ia ka sienjam ban pynthikna ba ki nongthoh khubor kiba kamai duna ia ka T.15000 kin shah kdup hapoh ka Provident Fund Scheme.
Kala pynbna ruh ia ka rai jong ka Sorkar ban ai ia ki Iing sha ki nongthoh khubor.
Ha kajuh ka por, ka Myntri kala pyntip ba ka Sorkar ka don jingthmu ban wanrah ia ki katto katne ki ainn ki ban tehlakam bad tynrong ia ka jingbahkhlieh halor ka jingpynsaphriang ia ki jingtip ba lamler.
