Shillong, Naiwieng 04 : U Myntri ka Tnad Pule Puthi Bah Lahkmen Rymbui ula pynshai ba ki kot jong ka CM Impact kim dei satia kiba mut tang na ka bynta ban pass eksam ki khynnah hynrei ki dei ki ban iarap ia ki ba kin ioh shuh shuh ia ki jingtip bad ka jingnang jingstad.
“Ki kot ka CM-Impact ka dei kaba mut ban iarap ia ki Khynnah ba kin nang pyniar ia ka jingtip, bad shisien ba kila ioh ia kane, khlem pep kan kyntiew ia ki ha ka jingpass ia ki eksam” ong u Bah Rymbui.
Ula ban jur ba ka Sorkar, ki nongpynmih ia ka kot bad ka jingkitkhlieh ka Board ban phah thoh ia kine ki kot, kin shim ia ki lad ban pynbeit lada lap ia kano kano ka jingbakla.
U Bah Rymbui ula kular ba yn shimkhia mar mar ban pynbeit ia kino kino ki jingbakla ha kine ki kot namar ki long kiba kongsan khamtam ba ki jingtip ne jinghikai ba ai sha ki khynnah ka dei ban long kaba beit bad ba shisha.
