Shillong, Naiwieng 04 : U Nongialam ka UDP bad Myntri Sorkar Bah Lahkmen Rymbui ula pynpaw ba hap ban bishar bha halor ka jingpynkha thymmai ia ka kynhun synrop ki seng riewlum na ka bynta ka Thain Shatei Lam Mihngi, da kaba ong ba ka jinghmu ba hakhmat eh ka party ka long ban iada ia ka hok bad ka jingmyntoi ki trai ri trai muluk ka Meghalaya.
“Kum ka UDP, ka jingthmu ba hakhmat eh jong ngi ka long ban iada ia ka hok ki briew ka Meghalaya bad ban pynthikna ia ka roi ka par ka Jylla” ong u Bah Rymbui.
Ula bynrap ba ka UDP kan shong bishar bniah shuwa ia ki jingmut, ki prokram bad ki jingthmu jong kane ka kynhun synrop ba thymmai hashuwa ban kynthoh eiei halor jong ka.
U Bah Rymbui ula pynpaw ruh ba ka jingmyntoi jong ki trai ri trai muluk ka Meghalaya ka dei kaba kongsan eh, khampher la kane ka kynhun ka dei jong ka thain lane ha ka Ri.
“Ngin hap ban peit lada la pynkha ia ka, kumno la pynkha, kaba kumno kane ka kynhun, kaei ka nongrim treikam jong ka” ula ong haba pynpaw ba ka UDP kana p bad peitthuh shuwa ia kiei kiei baroh.
