Shillong, Naiwieng 04 : Ki Pulit ka South West Khasi Hills, kila ioh kem ia 5 ngut ki runar kynthup uwei u Khynnah ba 16 snem, kiba dawa pisa na uwei u nongkhaii ka District, ha ka kyrteng jong ka kynhun Garo National Liberation Army-Regroup (GNLA-R).
Ia kane ka kynhun la ioh kem da ki Pulit ka Ranikor Police Station hadien ka jingioh pdiang ia ka ejahar bala mudui da une u Nongkhaii ha Nonghyllam Police Station, uba pyntip ba ula ioh pdiang ia ka shithi dawa pisa ba T.5.5 lak nalor ka jingbyrngem na ka phone.
U Superintendent of Police ka District Bah Banraplang Jyrwa, u pyntip ba ki Pulit ha ka jingtohkit, kila lapdien nyngkong ia u briew uba phone ia une u Nongkhaii bad kila leit ban kem ia u. Une u briew u kyrteng u Man Marak uba shong bas ah ha Rajapara.
Ha ka jingtohkit, u Man Marak ula phla ba don sa saw ngut ki paralok jong u bad ula ai ia ka kyrteng jong ki. Ki Pulit kila leit ban kem ia ki bad la tip kyrteng ia ki da u Marson R Marak, Babulin Sangma, Tartus N Marak bad uwei u khynnah. Ia kine ki briew la kem naduh ka 29, 30 bad 31 tarik Risaw.
“Kine baroh san ngut kila shna hi ia ka shithi dawa pisa ha ka kyrteng ka GNLA-R. Hynrei ym pat lah pynthikna satia kine ki runar ki dei ki dkhot jong kane ka Kynhun. Ka jingtohkit mynta ka dang iaid shakhmat” ong u SP.
U pyntip ba ki Pulit kila leit ban khynra ia ka Iingsah jong kine ki runar hynrei kim shym la lap satia ia kino kino ki tiar ki tar ne ki kot ki sla ban pynshisha ba ki dei ki dkhot ka GNLA-R.
“Imat kine ki briew kila shu kam ia kane ka kyrteng tang ban pyntieng ia ki briew ba kin siew ia ka pisa” ong une u Heh Pulit.
Une u Heh Pulit ula pyntip ba ka jingtohkit ia kine ki briew ka dang iaid mynta. U ong ba ka jingtohkit kan long ruh halor ka jingiadei jong ki bad ki katto katne ki dkhot ba pyndem wait jong ka GNLA kiba don ha ka thain.
.){kind=link}