Shillong, Jylliew 12: Ki Pulit ka Meghalaya kila sdang shaid shaid ia ka jingtohkit pyrshah ia ka Sonam Raghuvanshi bad ia ki 4 ngut kiwei pat halor ka jingshah pyniap u Raja Raghuvanshi, u nong Indore uba shah pyniap ha ka jingwan leh honeymoon hadien ka jingiathoh shongkurim ba dang 12 sngi bad ka Sonam, ha Sohra.
U Raja ula shah pyniap ha ka Parking Lot jongka kshaid Wei Sawdong ha ka 23 tarik u Jymmang bad ula shah bret shapoh ka riatbah riat sam kaba don hajan katei ka jaka hi. La lap ia ka met ka jongu ha ka 2 tarik u Jylliew kata hadien 10 sngi jong ka jingwad jong ka kynhun kaba kynthup ia ka Meghalaya Police, SDRF, ki ksew sma ne Sniffer Dogs bad ki Drone.
Ka Sonam bad ki 4 ngut kiba la suba pyniap kiba kynthup ia u Akash Rajput, Vishal Singh Chauhan, Anand Kurmi bad u Raj Kushwaha kila shah tian bishar ha ka sngi Balang ha ka iingkashari jongu District and Sessions Judge ha Shillong bad la aibor ia ki pulit ban tohkit 8 sngi ia kine baroh.
Katkum ka jingiathuh jong u Superintendent of Police ka East Khasi Hills Bah Vivek Syiem, kine kidei ki jingphla kiba kongsan halor katei ka jingjia:
1. U Raj Kushwaha udei uba la pynwandur ia katei ka jingthmu ne ‘mastermind’ ha kaban pyniap ia u Raja bad ka Sonam kadei kaba la iasuhbuit lang.
2. Kila pynwandur ia katei ka jingthmu ban pyniap 11 sngi hashwa ka jingiathoh kyntiew kurim.
3. Ki nongpyniap kila kwah ban pyniap ia u Raja Raghuvanshi ha kiba bun ki jaka hynrei kim shym la iohlad satia namar ka jingbym biang ki jaka.
4. Kila thmu ban pyniap ia u Raja ha Guwahati, nangta ha Nongriat, Mawlakhiat
5. Ula shah pyniap ha Parking Lot jong ka kshaid Wei Sawdong
6. Ka Sonam kala iarap ha kaban bret ia ka met shapoh riat
7. Kumba long mynta, ka daw jong ka jingpyniap kadei namar ka jingshoh jingieid hapdeng ka Sonam bad u Raj Kushwaha bad ka jingshah pynbor ka Sonam ban ia shongkurim
8. U Raj bad ki 3 ngut kiba la ai nong ban pyniap ki iadei shi paralok
9. U Raj ula dep ai T.50,000 sha kine ki 3 ngut na ka bynta ka leit ka wan bad ban sah ha Shillong bad Guwahati
10. Ka Sonam kala don ha Indore naduh ka 26 tarik u Jymmang haduh ka 8 tarik u Jylliew
11. U Raj ula pynbiang ia ka kali ban ialam ia ka Sonam sha Siliguri hynrei kane ka jingthmu kala pulom noh bad baroh kila shah kem.
