Shillong, Iaiong 30: U Myntri Sorkar ka tnad PHE Marcuise N Marak ha ka sngi Palei, ula ong ba ka jingpynkhie im biang ne Rejuvenation ia ki wah bad ki wahduid ha Meghalaya ka dei ka sienjam kaban iaid slem, ha kaba katto katne ki projek kila sdang ban iaid shakhmat ha kylleng ki bynta jong ka jylla.
Haba kren halor ka jinglong jingman jong ka jingpynkhie im ia ki tyllong um, u Marak ula ong, “Katto katne ki projek kidei kiba la iaid shakhmat hynrei kumba phi tip ka jingpynkhie im ia ki wahduid bad ki wah, kam dei satia ka sienjam kaban leh tang shipor, ngi dang iaid ha ka bynta ba ki sienjam kin dei kiban iai bteng”.
U Myntri ula ong ba ka sorkar kala shim ia ki sienjam bad ia ki buit treikam ban pynkhie im ia ki tyllong um.
“Ha ki katto katne ki bynta, ngi lah thung bun bha ki dieng bad la leh ruh ban pynjyrngam ia ki jaka bad ha ki katto katne ki bynta pat, ngi la shna ia ki jaka pynlang ban pynneh ia ka um slap namar ba ka Sorkar India kala banjur ba dei ban pynlang ia ka um slap kaba wan hap” ula ong.
Haba batai shaphang ka Trenching Method, u Marak ula ong, “Ban kem ia u slap uba wan hap, ngi lah thaw ia ki jaka pynlang um da kaba tih ia ki thliew khyndew. Kane kan iarap shibun namar mar ia jaw slap kan leit beit beit sha ki jaka pynlang um bad nangne kan rung shapoh jong ka khyndew namar nangne kan sdang ka lad jong ka jingpynkhie im biang”.
Katkum ka jingong ka jongu, ka rukom leh ka jylla kadei kaba iaid ryngkat bad ka Sorkar Pdeng ‘Catch the Rain’ Campaign, kaba kyntiew ban pynlang ia ka umslap bad ban pynneh pynsah ia ka um lyngba ka jingiatreilang ki shnong ki thaw bad ka jingpynneh ruh lyngba ki Watershed Management.
