Nongstoin, Iaiong 30 : U Myntri ki kam ialehkai ka Jylla Bah Wailadmiki Shylla, ha ka sngi Palei, ula buh mawnongrim ia ka project ban pynheh ia ka madan ialehkai Tirot Sing Memorial ha Nongkhlaw, kaba la mang haduh T. 5 klur. Ka project ka kynthup ruh ia ka VIP gallery.
Ia u Myntri la synran da u MLA ka thain bad Myntri Sorkar Bah Metbah Lyngdoh, ka Deputy Commissioner Kong Anita Kharpor, u Syiem ka Hima Nongkhlaw Paiem PM Syiem, ki Engineer ka State Sports Council bad kiwei kiwei.
Haba ai jingkren ha ka jingialang, u Myntri ula pynpaw ia ka jingkmen ba ioh ban buh mawnongrim ia kane ka madan haba iaroh ia u Nongmihkhmat uba la trei shitom ban pynioh ia kane ka project.
“Ka jingwan buh ia u mawnongrim kam dei tang ka dak, hynrei ka kam ba kan iaid beit shakhmat bad ngan iai buddien ruh ia ka jingpyntrei ia ka madan, khnang ban pyndep ia ka ha ka por kaba biang” ula ong.
U Myntri ula ong ba ki don bun ki project kiba ka Sorkar kala ai sha ki shnong hynrei sngewsih ban ong ba na ka liang ki nongshongshnong kim da don ia ka mynsiem sngew longtrai halor ki kam pynroi ba ki la ioh na ka sorkar ia kiba la mang khnang na ka bynta ka jingmyntoi jong ki.
Kumta, u la kyntu ia ki paidbah nongshong shnong ban ai ka jingiatreilang bad ka sorkar la ha kino kino ki project, ban sumar bha bad ban nym pynjot ia ki jingtei ba la ai, namar la mang khnang na ka bynta ka jingmyntoi u paidbah bad ba ki dei ban sngewtrai kum ia la ka jong, namar baroh ki skhim ne ki projek kiba la ai ka dei jong u paidbah.
U la ong ruh ka sorkar ka la shim ia ki lad ki lynti ban kyntiew ia ki kam sport ha ka jylla bad ka jingshna pynbha ia ki madan, ka dei shibynta ban ailad ia ki samla kiba don sap ba kin ioh pyntbit ialade ha ka sap kaba ki don, khnang ba kin kiew khamtam lei lei ha kine ki sngi ba ki khun samla ki im hapdeng ka jingjyllei jong u drok.
Ka jingdon jong ki jaka kilan met kiba biang kan iarap ia ki khun samla ban lait na ki jingmlien ba sniew. U la ong ruh ba ka sorkar jylla ka la shim ruh ia ki lad ki lynti ban kyntiew ia ki jaka ai jingsumar hapoh ka jylla, khnang ban pynsuk ia ka jingdonkam jong u paidbah khamtam ha ki jaka nongkyndong.
Ha kane ka juh ka sngi, na ka liang u myntri ki kam sport bad u myntri ba dei pei ia ka bording ki la pynlong ia ka jingleit jngoh ia ka CHC Nongkhlaw, ban buddien halor ka rukom treikam bad ai jingshakri jong ka ia u paidbah.
