Shillong, Jan 24: Ha ka shnong Lower Lumparing, u Bah Andrew Marbaniang ula ïeng hakhmat jong ki paidbah ban ïathuh ïa ka khana ka jongu halor ka jingjop ia ka jingiakhun na ka jingpang Tuberculosis (TB), kaba long ka jingai mynsiem ïa kiwei pat. “Nga dei u briew uba im bad long kum ka sakhi ba ka jingpang TB ka dei kaba lah pynkoit”.
Ula ong, “Lada nga lah ban pynliem ia ka, kumta kiwei kiwei ruh kin lah”.
Ka jingïakhun ïa ka TB ka long kaba jynjar bha, ha kaba ktah ia ka bor met bad kumjuh ha ka pisa pilain, hynrei namar ka jingioh jingsumar kaba mardor bad ka jingioh jingsumar ei na ka Sorkar, ula ioh noh mynta ïa ka met kaba koit ka khiah. Mynta kum u nongjop pyrshah ïa ka jingpang TB, ula aiti ïa ka por ka jongu ban kyntu ïa kiwei pat ban wad ïa ka jingïarap ban pyndep ïa ka jingshah sumar.
“Ki dawai ki treikam hynrei tang lada phi dih thikna ïa ki” ula ban jur haba pynshlur ïa baroh kiba don ïa ki dak ki shin jong ka jingjyrhoh, shitmet ne duna jingkhia ba ki dei ban leit phah peit bniah ialade.
Ka khana u Andrew ka long ka mat kaba kongsan ha ka jingpynsngewthuh paidbah ha ka TB Awareness Program ba long ha 23 tarik u Kyllalyngkot, 2025, kaba la pynlong da ka District Tuberculosis Office, East Khasi Hills.
Ka jingthmu jong kane ka jingïalang ka long ban pynsngewthuh ïa ki paid nongshong shnong shaphang ka jingpang TB, ki dak ki shin bad ka jingkongsan ban ioh ïa ka jingsumar kaba mardor.
Ka Dr. B.R. Garod, Medical Officer ka Lumparing Urban Primary Health Centre (UPHC), kala ai jingbatai ba ka jingpang TB kadei kaba lah ban iada bad kaba lah ban pynkhiah. Kala ong, ba ki dak ki shin ki kynthup ïa ka jingphuh syep mynmiet, ka jingpang shadem bad ka jingkhia bad kala kyntu ïa ki paidbah ba kidei ban buh hakhmat ïa ka koit ka khiah bad ban leit phah khmih bniah khelm kano kano ka jingtieng.
Ka Dr. Bayarilin Shanpru, District TB Officer, kala kren halor ka Pradhan Mantri TB Mukt Bharat Abhiyaan (PMTBMBA), ka mishon jong ka ri India ban pynduhjait noh ïa ka TB hapoh u snem 2025.
Kala pynsngewthuh ruh halor ki sienjam lyngba ka Nikshay Mitra, kaba ailad ïa kiba kwah noh synñiang ban kyrshan ïa ki nongpang TB da kaba ai ïa ki jingbam khnang ba kin bit kin biang ha ka rukom bam ïa ki jingbam kiba tei ha ka por ba ki dang don hapdeng ka jingshah sumar.
“Ka jingai jingsumar ïa ka jingpang TB kadei kaba ioh ei ha baroh ki jaka ai jingsumar sorkar bad kaba air uh iaka jingsumar bad ka long kaba lah ban ioh ïa ka jingkoit” kala ong.
Kane ka prokram kadei shi bynta jong ka 100-Day Intensified TB Campaign, kaba pynleit jingmut ban poi sha ki jaka kiba bun ki paidbah da kaba pyndonkam ïa ki kor bad ka jingiatreialng bad ki shnong ki thaw. Ha ka jinglah ban ai ïa ka jingkoit jingkhiah kaba 85% ha ka district, la bteng ban trei shitom shuh shuh ban ban ialeh ban pynduna iaka jingpynslem ha kaban ai ïa ka jingsumar.
Ki nongialam shnong, ki nongai jinsguamr bad ki nongshong shnong kila leit iashimbynta ha katei ka jingïalang da kaba iatreilang ha ka jingïakhun ban pynlong ïa ka lawei kaba lait na ka jingpang TB.
