Shillong, Jylliew 07: U Joint Director jong ka tnat Directorate of Animal Husbandry and Veterinary u H.K Marak ula pynshai ba ka dud bad ka doh Masi kim don jingktah eiei iaki koit ka khiah ki briew hynrei watla katta ruh ka long kaba donkam pat ban da shet bha ia ka dud ban dih bad iaka doh shuwa ban bam.
U H.K Marak ula ong ba ka jingpang Lumpy Skin Disease lane LSD ka dei ka jait jingpang iaka met ki masi bad kane ka jait jingpang ka ktah jur bha ym tang iaki masi hynrei ka lah ruh ban ktah ia kiwei pat ki mrad lada ki ia khleh lang ha juh.
Ula iathuh ba kat kum ka jingioh lum iaki kaiphod lyngba ka ophis treikam, haduh mynta 3500 tylli tam ki Masi kiba la shah ktah ha une u khniang jingpang ha kylleng ka jylla bad 29 tylli ki masi kila iap na une u khniang jingpang.
“Kane ka jingshah ktah ki masi haka jingpang LSD ka long kaei kaei kaba pyndunong iaka jylla hynrei watla katta ruh kam don jingktah pat iaka doh masi bad ka dud masi tang dei ban da shet bha ia ka dud ka doh shuwa ban dih ne bam” la ong u H.K Marak.
U H.K Marak ula kyntu iaki briew ban kham kiar ia ka doh thad namar ka dei kaba shu pynrkhiang ia ka doh tang da ka tdem.
Nalor kane u H.K Marak ula iathuh ba haduh mynta kam don ka dawai ban pynkhiah ia une u khniang hynrei ki lah tang ban ai da ki tika ia ki masi kiba dang koit khnang ban tehlakam ia ka jingpur.
“Naka bynta ban tehlakam ia kane ka jingpang, ki nongri masi kidei ban set ia ki masi kiba pang la ka jong, bad ban leh khuid ia ka sem khnang ba ki ksain ki nym ioh ban boi bad ia kiba la ioh ia kane ka jingpang ki nongri masi ki lah ban pynkyllan da u synrai tang kum ka jingiada bad lada iap ki masi dei ban da dep bha kumba 6 phut eiei hapoh khyndew” ula ong.
