Shillong, Jylliew 07: U Myntri ka tnat Pule Puthi ka sorkar jylla Rakkam A Sangma ula pyntip baka sorkar kan sa shim rai ban ai kam ia kino kino ki briew kiba ai jaka ei ban tei iaki Eklavya Model Residential School (EMRS) hapoh ka jylla.
Haba batai halor ka jingslem ban pyndep ban tei ia ki EMRS School, u Rakkam ula iathuh ba ka daw bah hi ka dei hi namar ba ka sorkar kam ioh jaka hynrei kum u Myntri ka tnat pule ula shimkhia halor kane ka bynta bad ula lum ka jingialang ha u bnai Iaiong bad baroh kiba don bynta ban tei ia kine ki skul.
“Ka Meghalaya ka hap hapoh ka khyrnit ba hynriew bad ki paidbah ki long trai iaki jaka bad haka jingialang ki trai jaka kila pynpaw ba lada ki ai jaka ka sorkar ka hap ban siew bailutksan lane ka hap ban ai kam sorkar hynrei ka kyndon jong ka sorkar pdeng ka dei hi ban ioh jaka ei ban tei iaki EMRS School” la ong u Rakkam.
U Rakkam ula iathuh ba shen un sa lum biang ka jingialang bad ki Deputy Commissioners (DC) jong baroh ki District bad naka liang ka sorkar jylla ruh kan sa shimia ka rai ban ai kam ia ki briew kiba ai jaka naka bynta ban tei ia kine ki EMRS Schools.
“Ka Sorkar Pdeng lyngba ka Education Ministry kala mang haduh 40 tylli ki EMRS School ban tei ha Meghalaya haka jinglut kumba T. 24 klur kawei ka skul bad haduh mynta ki jingtei ia kine ki skul kim pat sdang lait noh ha East Garo Hills” ong u Rakkam haba bynrap “Kum u Myntri ka tnat pule puthi, nga la shim ka jingkitkhlieh ban pyntip sha ki paidbah ba mynta u snem 2023, ki kam ki jam kin sdang noh ha ka ban tei iaki 40 tylli ki EMRS School ha Meghalaya”.
Naka liang u nongaibuit ka tnat Pule Puthi ka sorkar jylla u bah H.M Shangpliang ula ong ba ka sorkar kala ai por sa kumba shi bnai iaki Block ban ai jaka naka bynta ban tei iaki EMRS School bad lada ym ioh jaka, ka sorkar kam banse ban kynriah noh ia kine ki skul sha kiwei pat ki Block ba ai jaka.
U bah Shangpliang ula iathuh ba katkum ka kyndon ka Sorkar Pdeng, donkam haduh 15 hectare ka jaka khlem da donkam ban siew pisa naka bynta ban tei ia kine ki skul bad kam shym la don ruh kano kano ka jingiateh ban siew bailutksan ne ai kam sorkar iaki trai jaka kiba ai ajka ban tei EMRS School.
 hapoh ka jylla.){kind=link}