Shillong, Jylliew 7: U Myntri ka Tnad Jngohkai ka Jylla Bah Paul Lyngdoh hynne ka sngi Balang ula ong ba kum ka jaka shangkai ba khring bha, ka Jylla Meghalaya kala iohnong na ka jingslem ban wan ka lyiur namar ka jingjur ka jingwan tuid ki nongshangkai na kylleng ki jylla ka Ri.
“Ngim (kam jngohkai) shym la shah ktah eiei (da ka jingslem ka lyiur). Namar ka jingkiew ka jingshit kyr-ang ka bneng,ki briew na Guwahati (Assam) kila nang wan bun sha Shilong ban phet na ka jingshit ka bneng jong ki jaka them. Namar kata, kala ai jingmyntoi bha ia ngi” ong u Bah Paul haba iakren bad ki nongthoh khubor.
Hynrei ula ong pat “Kawei kaba ktah jur eh ia ngi ka dei ha ka kam pynmih bording hynrei kum ka jaka shangkai, ka Meghalaya kala iohnong namar nang bun ki briew na ri thor kila wan sha kine ki jaka lum” ula bynrap.
Ha ka sngi Ba-ar, u Myntri Rangbah ka Jylla Conrad K Sangma ula ong ba ka Sorkar Jylla kan hap ban pynlut sa kumba T. 300 klur ban thied ia ka bording lada ka jingtyrkhong ka bneng, ka dang iai bteng sa 100 sngi.
