Iasyllok ba President bad ki SHG ha Baljek
Tura, K’lyngkot 16 : Ka President ka Ri, Droupadi Murmu ha ka sngi Ba-ar, kala pynshlur ban pynkupbor ia ki kynthei ha ki bynta bapher bapher kum ha ka imlang sahlang, ka ioh ka kot, ka sain hima sima, ka kynja mynsiem ban pynurlong ia ka thong ha kaban lah pynlong ia ka India ka Ri kaba kiew shaphrang hapoh u 2047.
Ka President Murmu kala pynpaw ia kane ha ka jingialang bad ki Self Help Group (SHG), ki nongsengkam bad ki Nongrep kiba wan na kylleng ki bynta jong ka Jylla, kaba long ha Baljek, Jengjal, West Garo Hills hynne ka sngi Ba-ar.
Ka President kala ai ka jingiaroh ia ka Sorkar Meghalaya halor ka jingpyrshang borbah ban kyntiew ia ki SHG ki Kynthei, ban ithuh ia ka jingdonkam ban wanrah ia ka jingkylla ha kaba ki kynthei mynta kila shim ia ka bynta ban noh synniang lem sha ka jingkiew shaphrang jong ka Ri India.
Ha kane ka jingialang la iadonlang ruh u Lat ka Jylla Phagu Chauhan, u Myntri Rangbah ka Jylla Conrad K Sangma, u Myntri ka tnad bording AT Mondal, u Myntri ka Tnad Pule Puthi Rakkam Sangma bad kiwei kiwei ki kynrem ki lyndan.
Ka Murmu kala ban jur ba ka roi ka par ba la lamkhmat da ki Kynthei kan kiew rasong lada ki kynthei ki ioh ia ka jinglait luid ban jied, ka jinglaitluid ban kamai kajih bad ka jingkhlain ka jingshaniah halade da ki kynthei.
Haba pynshlur ia ki dkhot SHG ba kin ialam lynti bad kyntiew ia kiwei ruh, ka President Murmu kala ban jur ba ka lynti iaid jong ki kam dei kaba long tang marwei hynrei kaba iatakhuh bad bun ki kynthei hapoh ka Ri.
Hadien kane, ka President kala leit jngoh bad iasyllok ruh bad ki dkhot ki SHG kiba pyniaid ia ki stall bapher bapher ban pyni ia ki kam ba ki trei, bad kala pynlut por ruh 30 minit ban iakren iakhana bad ki.
U Lat ka Jylla Phagu Chauhan ula niew ia kane ka jingwan ka President kum ka kam ban sah khana haba ai jingithuh ia ka kum ka nongaimynsiem ia ki Kynthei bad ki paid riewlum hapoh ka Ri.
U Myntri Rangbah ka Jylla Conrad K Sangma ula kren halor ka jingaijait Kmie, ha kaba ki Kynthei kila shim ia ka bynta ba kongsan ha ka jingkiew ka ioh ka kot bad ka imlang sahlang. Ula kren ruh halor ka synniang jong kumba 10,000 tylli ki SHG ka Jylla bad ia ki policy lem bad ki skhim bala mang sha ka bha ka miat bad ka roi ka par jong ki Kynthei.
U Myntri Rangbah ula pyntip ruh ba nalor ka jingphaikhmat bha sha ka koit ka khiah, ka Sorkar Jylla kala pynleit jingmut bha sha ka jingpynkup bor ia ki Kynthei ha Jylla. “Ngi la ai bhah ba 50% ka kam Secretary sha ki Kynthei ha man ki Village Employment Council (VEC) ba don ha Jylla, ka ba pynthikna ia ka jingiadonbynta lem ba mar katjuh ha ka jingiashim rai” ula ong.
Ha kane ka prokram, ka President kala aiti ruh ia ka Community Investment Fund ba T.25 klur, ka ban ai jingmyntoi ia ki 1422 tylli ki Village Organisation ka Jylla. Nalor kane, ka President kala buh mawnongrim ruh ban tei ia ka Integrated Administrative Complex ba thymmai ha Tura.
