Shillong, Jylliew 13 : U Symbud Myntri Rangbah ba khmih ia ki kam Pohiing (Police) Bah Prestone Tynsong ula ong ba ka jingkylli kam mih satia ban phah thoh eksam biang da kawei ha ka jingthung Pulit ha ki kyrdan bapher bapher ha Jylla.
Ula kynthoh ia kane halor ka jingdawa ba dang shen da u Nongialam ka Liang Pyrshah bad Myntri Rangbah barim Mukul Sangma ban pynlong biang da kawei ka jingthoh eksam namar ka jingkynnoh bym lah ka Central Recruitmnt Board (CRB) ban iaid kat kum ki kyndon ban pynthikna ia ka jingleh khuid ha ka rukom thungkam.
U Mukul ula buh jingkylli la ka don kano kano ka kyndon ia ka CRB ba kan ailad iaki nongiakhun eksam ba kin phah ia ki jingmudui hadien jong ka eksam.
Haba kylli ia kane, u Bah Prestone ula ong ba kam lah ban long ha kaban pynlong biang ia ka eksam. Ula pyntip ba ka CRB jong ka Meghalaya Police kala ioh pdiang ia katto katne ki jingmudui.
“Nga la iohi ia ki jingkyrpad. Ka jingeh hangne ka long kumne, don ki khep ba kine ki nongiakhun eksam ha ka por ba ki don ha ki kamra thoh eksam, kim shym la ong eiei, kila dei ban iathuh hangto hangto lada jia ba ki iohi ia kiwei ki nongiakhun eksam ki thep lang ia ki mobile namar kila ioh ia ki SOP hashuwa ba kin rung ha ka kamra thoh eksam. Kumta, hadien 2-3 sngi, ngi la ioh pdiang ia ki jingujor ia kaba nga sngew ba kala slem. Balei kine ki nongujor kim shym la ujor hangto hangto hi haba ki iohkem iano iano ba leh thok ha ka eksam” ula ong haba iakren bad ki nongthoh khubor.
“Kumta, hadien ba bishar ia ki jingujor, ngi la leh ia kaba donkam. Ngi la ong ha ki naba don napdeng jong ki, kim shym la ai ia ka jingtip ba pura ia ka jaka sah, ki kyrteng ba pura, kumta, ban shu ong ban phah thoh eksam biang da kawei kam dei ka kam kaba suk” ula ong haba bynrap “Lada dei ba tang 100-200 ngut ki briew te hooid, hynrei ki don da ki hajar ngut ki nongialeh ia ka eksam. Ki don da ki hajar ngut ki bym shym la ujor, kin leh aiu kine, shaei ngin leit?.
“Ngi la dep bishar ia kine kiei kiei baroh bad kumta, ban phah thok eksam biang da kawei ka dei ka bym lah ban long” ong u Bah Prestone
 Bah Prestone Tynsong ula ong ba ka jingkylli kam mih satia ban phah thoh eksam biang da kawei ha ka jingthung Pulit ha ki kyrdan bapher bapher ha Jylla.){kind=link}