Shillong, Lber 06 : Ka seng Hynñiewtrep Achik People Council (HAPC) kala pynpaw ia ka jingsngewkhia ba ka jingiakhih ban dawa Myntri Rangbah da u Khasi ha Jylla ka lah ban wanrah ia ka jingsngew iapher jaidbynriew.
Kane ka seng hapoh ka jingialam u President samla Jylliew Sing Marwein, kala pynrem jur ruh ia ka jingleh shitkhlieh jong ki katto katne ngut kiba la leit kawang maw bad wiang ding ia ka Ophis treikam jong u Bah Methodious Dkhar, MLA ka Mawshynrut constituency.
Ha kajuh ka por, une u Samla ula ai ka jingiaroh ia ki paidbah ka thain Mawshynrut kiba khem ngop ha ki jingshah ialam baka ha kiwei pat namar ka jingleh jong u MLA bad uwei pat u para MLA na ka seng HSPDP ban eit kyrshan ia ka NPP ha kaban thaw Sorkar.
“Kine ki MLA kim shym la mih na ka seng hynrei ki leit tang ban ai jingkyrshan ha kaban thaw ia ka Sorkar bad ka dei ka hok jong ki ban leh ia kata haba u paidbah ula bynshet ia ka bor ban long u Nongmihkhmat ka thain” ula ong.
Halor ka jingdawa Myntri Rangbah da u Khasi, une u Nongialam ka HAPC ula ong “Kumno yn dawa Myntri Rangbah da u Khasi haba wat ia uba don ruh ngi dang kynthoh sniew kum ia u bah Prestone Tyngsong uba lah dei uwei na ki riew shymphang bad uba lah jop donburom bunbun sien”.
“Ngi lah dei ban sngewthuh ia kaei ka jingmut kaba ngi ong ka democracy, bad kumno yn shu dawa ne kwah Myntri Rangbah jubor da u Khasi haba katba dang don hapoh ka shatri Meghalaya, lada ka long kumta kan wanrah pynban ia ka jingiasngewpher jaidbynriew” ong utei u samla.
