Shillong, Jymmang 05: “Ka jingjop kam dei ban kut tang ha ka iohkam sorkar” ong u Myntri ka tnat Pule Puthi u Bah Lahkmen Rymbui haba ai jingkren ha ka jingrakhe dap 50 snem ka Nongsder SSA LP School, da kaba kyntu ia ki khynnah skul ba kin pynleit jingmut ha ka jingpynroi iala ki sap ba ki don naduh dang rit.
Haba kren ha ka prokram, u Bah Lahkmen u la ai burom ïa ki nongseng bad ki briew ba noh synñiang ba nyngkong eh ban pynlong kam ia kane ka skul.
U Bah Lahkmen ula batai ïa ka jingdon jong ki nonghikai ba nyngkong jong ka skul kum ka por kaba kongsan bad kaba donkam tam hapoh ka imlang sahlang jong ka skul.
Ula ban jur ia ka jingdonkam ban pynroi ia ki sap ki phong daka ba kdew iaka jingthmu jong ka Community Skills Integrated Learning Initiative.
U la kyntu ïa ki khynnah skul, “Khamtam kito kiba wan na ki thain nongkyndong, ban shim kabu ïaka Community Skills Integrated Learning Initiative ban kyntiew iaki sap ba ki don”.
U Myntri ula iawer ia ki kmie ki kpa ban don bynta ha ka ban btin lynti ia la ki khun da kaba pynshlur ia ki ban shimkhia haki jingshah ai jinghikai pyntbit.
Haba jubab halor ka dorkhas ba la aiti da ki bor pyniaid skul, u Myntri u la pynthikna ia ka School Management Committee ba un lum ki jingialang ban iakren iakaei ka ba donkam ban kyrshan iaka skul.
Ula kyntu ruh ïa baroh ki nongshim bynta ba kin pyndonkam hok ïa ki lad ki lynti ba la ai da ka Sorkar Jylla bad Sorkar Pdeng.
Ïa ka program rakhe dap 50 snem jong ka skul, la wan sakhi da u Myntri ka tnat Pule Puthi haka jingdonlang u MDC ka thaiñ u Bah Shemborlang Rynjah, u SDSEO, bad u SDO ka Pynursla Civil Sub-Division, ryngkat ka Headmistress, ki nonghikai, ki kmie ki kpa bad ki khynnah skul.
Ia kane ka skul la seng ha u snem 1976 da uwei u dkhot ka District Council bad kane ka skul kaba la ioh jingkyrshan nyngkong daka District Council, ka don 30 ngut ki khynnah skul bad uwei ka nonghikai, hynrei mynta ka la kiew sha ka jingdon 77 ngut ki khynnah skul bad 3 ngut ki nonghikai bad mynta ka treikam hapoh ka Samagra Shiksha Abhiyan.
