Dawa ka JNC ia u DC ban nym phah lum khana samari 2027 ha ki Nonghikai

Shillong, Jymmang 5: Ka Jaintia National Council (JNC) Khliehriat Circle ha ka sngi Baar, kala leit ujor ha u Deputy Commissioner bad Principal Census Officer, East Jaintia Hills District, ba dawa ban pynsangeh noh ia ka jingphah ia ki nonghikai sorkar ban leit lum Khanasamari na ki iing ki sem ne Census 2027 House Listing Operations bad kynnoh ba kane ka rukom leh kadei ka jingpynkhein ia ka riti synshar pyrshah ia ki khynnah riewlum jong ka district.

“Ka Section 27 jong ka Right of Children to Free and Compulsory Education (RTE) Act, 2009, ha kaba la shah ia katto katne ban leh ia ka kam lum census, kam shim la aibor ia ka jylla ban sei ia ki nonghikai na ki kamra skul ha ka por ba dang long skul, da kaba ieh ia ki khynnah riewlum, kaba ka lad pule ka jongki kadei tang lyngba ki skul sorkar bad ki skul shimet, khlem kano kano ka jingai jingbthah” ong u Working President ka JNC-KC u bah Diamon Bareh.

Haba pynksan lyngba ka rai ka iingbishar ula ong, “Ka iingbishar jong ka Allahabad High Court ha kaba iadei bad ka Chandani Devi & Ors vs State of UP (W.P. No. 26228/2021) kala batai shai ia ka kyrdan ka jongka. Nalor kane, ka Section 25 jongka RTE Act kala pynkup bor halor ka Pupil-Teacher Ratio (PTR) dei ban pynneh ha baroh ki por, ka jingpynkup bor ia kaba la pynkhein pyllein pyllein ha kylleng ki skul hapoh jongka East Jaintia Hills.”

“Ka Article 21-A jong ka riti synshar ka ri India kala pynthikna ba man la ki khynnah kin ioh ia ka hok jong ka pule puthi. Ki bor synshar kim lah ban kam ba kila iengskhem halor katei ka hok bad ha kawei pat, ka jingleh ka jongki, kila sei ia ki nonghikai na ki kamra skul ban leit lum ia ki kot ki sla Census” ong u Bah Bareh.

Ka Council kala buh jingkylli ruh ha kaba iadei bad ka rukom bhah tyngka na ka bynta katei ka jingpyntrei ia ka kam.

“Ka Sorkar Pdeng kala bhah T.11,718.24 Klur na ka bynta ka Census 2027 — ka bhah tyngka kaba dei na ka bynta ban leh halor ki kam kiba iadei bad ka jinglut jingsep ha ka jinglum ia ka Census. Ka JNC kala dawa ba dei ban pynpaw ha ka lynti kaba shai kdar bad kaba khuid ba suba haduh katno la pynlut na ka bynta ban aiwai nong ia ki nongshong shnong ban lum ia ka Census ha East Jaintia Hills bad haduh katno na kane ka bhah tyngka la lah ban kunai ‘Save’ da ka jingpyndonkam noh da ki nonghikai?. Kam shim la don kano kano ka jingpynshai ha kaba iadei bad ka jingpynlut pynsep. Kane kadei ka jingjaituh jong ki bor pyniaid kaba kila siew sha ki khynnah riewlum” ula ong.

Ka JNC kala kynthoh ruh ia ka jingbym lah ban pynpoi ia ka jingpyniaid shakhmat ia ka Self Enumeration naduh ka 1 tarik haduh ka 15 tarik u Jymmang.

“Ha ka district ha kaba bun kim ioh tang ia ka internet ruh bad kam shim la don ruh ka ktien tynrai ha ka Census portal, kata ka jingai jingpynsngewthuh kam don eiei satia lait tang ka jingpynbna ha ki social media bad artylli ki jingpynbna paitbah kiba la treikam khlem da kynthup ia ki hajar tylli ki longiing riewlum ba kin long kiba shah kynthuplang ha ka Census ka jongki. Ym shim la don ka Block-Level Help Desks. Ym shim la don kano kano ka jingpyntip ha ki shnong, ym shim la don kano kano ka jingpynbna paitbah, ym shim la kynthup lang ia ki Dorbar Shnong” u Bah Bareh ula ong, ba kane kadei ka jingpulom kaba ar shah ne “Double Failure.”

Ka Council kala kyntu ia u Deputy Commissioner ban pynsangeh noh mardor ia hukum ban pyndonkam ia ki nonghikai ha ki kynta long skul, ban pynrungkam da ki nongshong shnong kum ki Enumerator khnang ba kan long ka jingplie lad ban aikam aijam ha ryngkat bad ka iada ia ka pule puthi bad ban thaw ia ka Block-Level Census Facilitation Help Desks bad ki nongtrei kiba nang ia ka ktien Pnar-hashwa ka 15 tarik u Jymmang. Nalor kane kala pan por ruh ban pynjlan ia ka “Self Enumeration” na ka bynta ki Block kiba don sha jngai bha bad ka jingai ia ka kaiphod da ka jingthoh halor ka jingbud ryntih hapoh jong ka 7 sngi bad ban pynpaw ruh ia ka jingpyntrei ia katno ngut ki nonghikai bad ka jingpynlut ia ka pisa.

Ka JNC kala maham ba kan pynjur da kaba shim da kiwei pat ki lad ki lynti lada jia ba ka jingdawa kam long kaba seisoh.

U Deputy Commissioner ula ong, ba yn sa shimkhia ia kane bad ka sorkar jylla.

“Ki khynnah pule jong ka East Jaintia Hills kim dei ban kylla langknia tang na ka bynta ka jingbit jingbiang jong ki bor kiba dei khmih. Ngi ngin ym shah satia ba ia ka hok jong ka riti synshar jong ka jaidbynriew yn hap ban len noh ha ka pulpit ban pynlynkot ia ki kam jong ki ophisar. Ka Ain ka don ha ka liang ka jong ngi bad ngin pyndonkam ia ka” la ong u Bah Bareh.