Shillong, Jymmang 05 : Ka Jylla kala sakhi ia ka jingjur bha ka jingshah dait ksew ki briew- ym tang ki ksew surok hynrei wat kiba ri ki briew – kaba lah ban buh ruh ia ka jingim ki nongshah dait ha ka jingma ba lah ban poi ruh sha ka jingiap lada ym shim ia ki jingsumar. Namar kata, ka long kaba kongsan ba ki nongshongshnong kin tip ia ki ain, ki ba lah ban tehlakam ia ka jingshah dait ksew.
Haba phai sha ki ksew ba ri ki briew, ka Ain Bharatiya Nyaya Sanhita (BNS) 2023, kala buh kyrpang ia ka kyndon ain, ka ban ai jingpynsajia ia ki trai ksew kiba pynlait laitlan ia ki jingri jong ki, lada jia ryngkat ba ki dait ia ki briew ba iaid ba ieng.
Kat kum ka kyndon 291 jong ka BNS Act, 2023, la kren shai ba la khang pyrshah ia ka jingpynlait laitlan ia ki ksew ba ri, buh jingma ia ka jingim briew lane pynmong pynmynsaw (kaba mut lada ki ksew ki dait briew), ki trai kin ngat ha ka jing shah set along haduh hynriew bnai lane bad ka kuna kaba long haduh T.5000 lane baroh artylli ki jingpynshitom.
Ka ain ka ong ba la khmih lynti ba ki trai kin tehlakam ia la ki jingri, buh ha ki jaka kiba shngain, lane pynkiar iala ki jongri na ka jingbuh jingma ia kiwei.
Ka kren shai ruh ba kine ki jingpynshitom ka dei ruh ia ka jingbym phikir iala ki jingri la ka long kaba leh khnang (haba tip ia ka jingma hynrei leh bym patiaw) lane ba shu jia ryngkat (ka jingbym shim lypa ia ki lad jingiada).
Ka ong ba wat lada kam shym la jia kano kano ka jingma ia kiwei, ka jingbym phikir hi iala ki jingri ka dei kaba lah ban pynshitom lada ka buh ia ka jingma.
Namar kata, ka long kaba donkam ia ki nongri ksew ba kin phikir bad set iala ki jingri ha ki jaka kiba shngain, ym ban shu pynlait lan lem kumta ki jingpynsajia ki ap hakhmat.
