Shillong, Naiwieng 03 : U Myntri Sorkar bad MLA ka Amlarem Bah Lahkmen Rymbui ula pynpaw ia ka jingsngewkhia halor ka jingkylla jngut jong ka Wah Umngot-kaba bna nam ia ka jingsgur phlir phlir bad ong “ka jingjngut ka Wah Umngot ka dei ka jingduh ka kamai kajuh ki paidbah”.
U Bah Rymbui ula shim ba ka jingkylla jngut jong ka Wah ka dei namar ka jingtheh khyndew jong ka kompani kaba pyntrei ia ka surok Shillong-Dawki sharum jong ka thain Laitlyngkot.
Ula ban jur ba kane ka Wah ka long kaba kongsan bha ia ka kam jngohkai bad ki trai shnong da kaba ong “Ka Wah Umngot ka dei kaba bna nam ia ka jingsnur phlir phlir ka um bad ki briew kiba iashonglieng bad kumjuh ruh ia kito kiba khwai dihkha, ki ieid bha ia ka wah Umngot”.
“Hynrei ha kine ki khyndiat taiew namar ka jingpynheh ia ka surok ym hajan ka wah Umngot hynrei la shem ba sharum ka Laitlyngkot, ka don kawei ka wahduid kaba tuid sha wah Umngot, kumta, lada phi kynmaw bha ba ha kine ki khyndiat taiew bala lah shuwa ka puja ne hapdeng ka puja, kala don ka jingtwa khyndew ha katei ka thain bad imat ka kompani lane ki contractor kiba pyntrei ia ka surok, kila theh ia ka khyndew ha ka jaka ba amrjan tang ban pynkhuid ia ka surok bad imat kane ka khyndew kala tuid sha kane ka wahduid bad rong pat sha wah Umngot” ong u Bah Rymbui.
U pyntip ba u Symbud Myntri Rangbah ka Jylla Bah Prestone Tynsong ula bthah ia ka kompani ba kan shim ia ka sienjam ha kaban tehlakam noh mardor ia kane.
“U Symbud Myntri Rangbah ba khmih ia ka Tnad PWD Bah Prestone Tynsong ula dep kren ia ka kompani ban peit ba kumno kane ka Wah Umngot kaba itynnad, kaba dei ka spah jong ka Jylla ha ka kam jngohkai, kan khuid biang. Ka Umngot ka dei kawei na ki jaka wankai, ka Shnongpdeng ka dei kawei ka jaka wankai, ka Dawki ka dei kawei ka jaka wankai ki nongjngoh pyrthei-namar kane, ki briew naduh Khanapara haduh Shillong haduh Umngot kila ioh kamai”.
Haba kylli, u Bah Rymbui ula pynpaw ia ka jingkhmih lynti ba ki bor Sorkar kin leh eiei lad aka kompani ka pynkhrein ia ki kyndon bala buh ha ka Detailed Project Report (DPR).
“Shuwa ban shna ia kano kano ka Sorkar, ka DPR kala buh ia ki kyndon iada mariang bad kumta lada ka don kano kano ka jingpynkhein ia ki kyndon ka DPR, ka State Pollution Control Board lane ki bor ba dei khmih, ki hap ban leh eiei kat kum ki kyndon jong ka ain” ula ong.
