Ka jingiatreilang ka TMC-NPP ha GHADC ka pyni ba ki party ki lah ban iatylli na ka bynta u paidbah, ong u CM

Shillong, Lber 25 : U Myntri Rangbah ka Jylla Conrad K Sangma ha ka sngi Balang ula iaroh ia ka jingtreilang hapdeng ka Trinamool Congress (TMC) bad ka National People’s Party (NPP) ha Garo Hills Autonomous District Council (GHADC) kum ka “Khubor kaba khlain” ba ki seng sain pyrthei bapher bapher bad ki nongialam ki lah ban klet ia ka jingsngew party haba phai sha ka bha ka miat jong u paidbah.

Haba kylli halor ka lynti kaba lah ban wanrah ia ka jingiatreilang kaba snem bad ka TMC, u Conrad ula ong “ Ia mynta hi, Nga dei ban ong ba nga kmen ban iohi ia kane haba buh shadien ia ka jingsngew iapher party ne iapher kyrdan, ka TMC bad MDC jong ka TMC bad ki Nongalam jong ka TMC bad ruh katto katne ki MDC shimet, kila iawanlang na ka bynta ka hok ki paidbah bad ki jingsngewkhia u paidbah khamtam ki paid riewlum ka ri-lum Garo”.

Ula bynrap “Kumta, kane ka dei kaba itynnad bad ka khubor kaba khlain sha ki paidbah ka ri-lum Garo ba ynda dei hi u paidbah, ki seng sain pyrthei bapher bapher bad ki nongialam ki klet ia ka jingsngew party bad peit ia kaei kaba bha tam na ka bynta u paidbah ka Jylla. Nga sngew ba kane ka dei ka nuksa kaba biang eh”.

U Conrad ula pynpaw ia ka jingsngewnguh ia ki MDC ka TMC, ki MDC shimet bad ki nongialam ka party namar ka jingkyr shan jong ki, kaba lam sha ka jingmynjur ia ka amendment jong ka AD Rules, kaba pynlong kongsan ia ki kyrtong ba kin don ia ki syrnot Scheduled Tribe (ST) ba kin iakhun elekshon.

Ka rai ban pynkylla ia ka AD Rules kala wan jia ruh hadien ba ka Sorkar Jylla kala rai ban pynjlan ia ka samoi treikam jong ka GHADC da hynriew bnai, kaba la mih hadien ka jingiakulmar ba neh palat taiew pyrshah ia ka jingioh iashimbynta ki bar jylla ha ka elekshon ka Council, kaba la buh nyngkong ban pynlong ha ka 10 tarik Iaiong.