Shillong, Naiwieng 22: U Myntri ka Tnad Fisheries u Timothy D Shira ula banjur ia ka jingkiew shaphrang ka jylla ha ka kam ri dohkha bad pynpaw ia ka jingkongsan ban iada ia ki um khlaw bad ki wah.
Haba kren ha ka jingrakhe ia ka World Fisheries Day ha ka sngi Thohdieng, u Shira ula iaroh ia ka jingtrei shitrhem ki samla kiba la shimkhia ia ka kam ri dohkha kum ka lad kamai jakpoh bad ong, ba kane kadei ka jingleh kaba bha kaba iaid ryngkat bad ka jingiohi jngai jong ka jylla khamtam ha kaban kyntiew ia ka jingsengkam lajong ha ki thain nongkyndong.
U Myntri Sorkar ula banjur ia ka jingdonkam ban don ka roi ka par kaban iaid ryntihlang bad ka jingiada bad pynneh pynsah khamtam haba ka kam ri dohkha kadei kaba iadonbyntalang bad ka imlang sahlang bad ka ioh ka kot jong ki shnong ki thaw ha nongkyndong.
Ula pynpaw ruh, ia ki sienjam kiba la shim da ka Sorkar Jylla lyngba ka Tnad Fisheries kaba kynthup ia ka jingkyntiew ia ka jingri dohkha katkum ka juk stad saïan, ka jingbuh ia ki jaka pynkha ia ki symbai dohkha, ka jingai jinghikai pyntbit ia ki nongri dohkha bad ban pynkhlain ia ka imlang sahlang kiba pyniaid ia ki jaka ri dohkha.
Ula ong, ba ka sorkar jylla ka iengskhem halor ki jingkular hapoh jong ka Pradhan Mantri Matsya Sampada Yojana (PMMSY) ban kyntiew ia ka jingpynmih ia ki dohkha bad ban kyntiew ia ka kamai kajih jong ki nongri dohkha.
U Myntri ula kyntu ban don ia ka jingiatreilang hapdeng ki tnad sorkar, ki jaka pule kiba wad bniah bad ki shnong ki thaw ban pynthikna ba ka Meghalaya kan kylla long kum ka nuksa, ba ka jingri ia ki dohkha kan dei kaba iahap bad ka mariang ha ka thain.
Ula pynpaw ruh ba ka sorkar ka iengskhem ha kaban bteng ban ai ka jingkyrshan ia ki nongri dohkha lyngba ki jingtei kiba kongsan, jingai jinghikai, ka jingplie lad ban ioh ia ka pisa bad ka jingsdang pyntreikam ia ki kor teknoloji.
Ha kane ka jingialang la iadonlang u Harish Chandra Chaudhary, IFS, Principal Secretary ka Tnad Fisheries ryngkat bad u Director bad Joint Director ka tnad Fisheries.
U Principal Secretary ula kren shaphang ka jingdon ia ka jingiadei kaba iajan bha hapdeng ka sawdong sawkun ka mariang kaba koit ba khiah bad ka jingiaid shaphrang jong ka kam ri dohkha.
Ula banjur ba ka tnad Fisheries Department kala iaid shakhmat hapoh ka jingialam u Myntri Rangbah ka Jylla u Conrad K Sangma ryngkat bad u Myntri uba khmih ia ka tnad Fisheries bad ruh da ka jingkyrshan kaba pura na ka Sorkar India.
U Principal Secretary ula pyntip ba ia ka Draft Bill ban pynneh pynsah, ban kyntiew bad ban pyndonkam ia ki jingdon jingem ha kaba iadei bad ka jingpynmih ia ki dohkha kadei kaba dang pynkhreh pura da ka sorkar Meghalaya, kaba pynleit jingmut ha kaban don ia ka jingpyniaid kaban neh shirta, ki jingpyrkhing bad ban iada ia ki dohum dohwah bad ia ka sawdong sawkun ka mariang.
Ha kane ka jingialang la pynkup burom ruh ia ki nongrep bad ki nongsengkam kiba la noh synniang bha ha kaba iadei bad ka kam ri dohkha, ha kaba kila ioh pdiang ia ki khusnam bad ia ka song tyngka bad la ioh ruh ia ka jingkren na ki nongri dohkha kiba la iathuh ia ki khana jop ki jongki bad kala don ruh ka jingpyni ia ka jingri dohkha da kaba pyndonkam ia ki buit katkum ka jingstad saïan bad ka rukom pyniaid ia ki jaka ri dohkha da kaba don ia ka jingkitkhlieh.
