La plie ïa u mot sah kynmaw jong u (L) Maieit Hopingstone Lyngdoh
Nongstoiñ, Nailur 26: Kum ka dak ka jingkynmaw burom їa ka lyngkhuh snem ba hynñiew jong ka jingkhlad noh jong u (L) Bah Hopingstone Lyngdoh, u nongseng jong ka Hill State People Democratic Party (HSPDP), mynta u snem ka party ka la shim ïa ka sien jam kaba khraw na ka bynta ban pynsah ïa ka nam bad ka kyrteng jong u, da kaba tei ïa u mot sah jingkynmaw ha kliar jong uwei u lum u ba itynnad bha ha Mawphanlur.
Ïa utei u mot la plie mynta ka sngi da bah K.P.Pangñiang president rangbah ka party, ha ryngkat ka jingїadon lang jong ki trai khyndew kiba la ai sngewbha їa katei ka jaka, kiba haїing hasem jong u (L) bah Hopingstone Lyngdoh, ki khun pyrsa trai ba kynthup їa u bah Danielstone Lyngdoh Nonglait, ka kong Badariti Lyngdoh Nonglait bad kiwei kiwei.
Kiwei kiba la їadon ryngkat ki long u bah Panbor Ryntathiang, bah Primson Makdoh kyrtong ka HSPDP na Umsning constituency, bah Methodius Dkhar kyrtong ka HSPDP na Mawshynrut constituency, bah Shakliar Warjri kyrtong HSPDP Mawthadraishan constituency, bah Martle Mukhim MDC ka Mawkynrew constituency, bah Robertjune Kharjahrin President rangbah ka HYC seng kmie, ki nongshong shnong katei ka thaiñ ryngkat ki paitbah na kylleng ki jaka kiba la wan ban sakhi lang.
Ha kane ka sngi wat hapdeng jong ka jingpynthut jong u slap, la plie їa utei u mot bad hadien ba la plie la pynlong ka jingїalang ha kaba la pynphuh pynphieng da ki nongrwai sur tynrai kiba la wan na ka Musical Institute Nongstoiñ college bad kiwei kiwei.
La pynїaid їa ka jingїalang da u bah Bony Lyngdoh Lyngkhoi president ka HSPDP Rambrai Jyrngam constituency Youth wing bad na ka liang ka Kur Lyngdoh Nonglait, la їoh їa ka jingkren na ka kong Badariti Lyngdoh Nonglait, ha kaba ka la pynkynmaw їa ki jinghikai bad ki jingsneng jingkraw jong u kñi jong ka їa ka kur ka jait bad їa ki nongshong shnong.
Ka kong Bada ka la pynkynmaw ruh ba u (L) bah Hopingstone Lyngdoh haman la ki jingthoh kiba u buh u ju thoh їa kine ki kyntien ‘Iaid hok bad їaineh’.
U bah K.P.Pangñiang haba ai jingkren, u la ong ba ka jingtei їa u mot sah jingkynmaw їa u (L) Maieit Hopingstone Lyngdoh ha katei ka jaka, ka long namar ba ka party kam sngew dei ban klet їa u nongїalam u ba la len lade na ka bynta ka їap ka im jong ka jaitbynrirew.
Nalor kata u la ong ruh ba ki matti jong u (L) maieit Hoping kiba u la buh hakhmat ka jaitbynriew, ki dei ki dak ki shim ba ka jaitbynriew ka hap ban buddien, namar ka jaitbynriew kaba klet їa ki matti ba la hikai bad buh da ki longshuwa, ka dei ka jaitbynriew ka bym ieit їa la ka jong ka kynja bad ka jait ka khong.
